Америка хитайниң сичүәнниң аба наһийисидики тибәт намайишчилириға күч ишләткәнликини тәнқид қилди

Америка дөләт ишлар министирлиқи баянатчиси марк тонер пәйшәнбә күнки баянатида, хитай бихәтәрлик күчлириниң абадики кирти ибадәтханисиниң ишлириға арилишиши “хәлқара җәмийәт тәрипидин бирдәк етирап қилинған диний әркинлик вә кишилик һоқуқ принсипиға зит” дәп тәкитлигән.

Хәлқара тибәт һәрикити тәшкилатиниң баян қилишичә, өткән ай кирти ибадәтханисидики бир тибәтлик раһиб өзигә от қоюп берип өлгәндин кейин, хитай бихәтәрлик күчлири мәзкур ибадәтханидики раһибларни тарқақлаштурмақчи болуп, ибадәтханиға кирмәкчи болған. Лекин бу ибадәтханидики раһиб вә йәрлик тибәт аһалисиниң қаршилиқиға учрап, хитай бихәтәрлик күчлири билән йәрлик тибәт хәлқи арисида тоқунуш йүз бәргән.

Хәлқара тибәт һәрикити тәшкилати тоқунушта нурғун тибәт пуқралириниң “еғир яриланғанлиқи” ни билдүргән иди. Марк тонерниң әскәртишичә, америка һөкүмити бу мәсилини хитай әмәлдарлириниң алдиға қойған болуп, у америкиниң “вәзийәтни йеқиндин тәқиб қиливатқанлиқи вә әлвәттә бу вәқәдин әндишә қилғанлиқи” ни билдүргән.

Хәлқара тибәт һәрикити тәшкилатиниң илгири сүрүшичә, хитай аманлиқ күчлири кирти ибадәтханисидики 2000 дәк раһибниң ичидики бир қисим кишиләрни ибадәтханидин чиқармақчи болған. Буниңдин нарази болған йәрлик тибәт аһалиси раһибларни қоғдап, хитай аманлиқ күчлири билән тоқунушқан.