Xitay dölet komandisining sabiq doxturi xitay tenterbiyichilirige rohlandurush dorisi qollan'ghanliqini pash qildi

Xitay döletlik gimnastika ömikining sabiq doxturi shö yinshyen, jüme küni awstraliye axbarat wasitilirige ashkarilap, 1980 we 90 yilliri xitay döletlik gimnastika komandisining tenterbiyichilirige izchil rohlandurghuchi gormon bérilip kelgenlikini bildürgen.
Muxbirimiz erkin
2012-07-27
Share

Uning ashkarilishiche, da'iriler “Ilmiy beden chéniqturush” ning bir qismi süpitide gimnastikichilargha “Resmen stéro'id” dep atilidighan rohlandurghuchi we adem bedinini küchlendüridighan gormon bérip kelgen.

Shö yinshyen “Sidnéy seher pochtisi” ge ashkarilighan uchurida yene “Uni ishlishining 1980‏-yillarda ewjige chiqqanliqi”, biraq tenterbiyichilerning özige qandaq okul uruluwatqanliqidin xewiri yoqluqini, buninggha qarshi turghan tébbiy xadimlarning chetke qéqilidighanliqini bildürgen.

Xitay tenterbiyichilirining rohlandurghuchi gormon ishlitidighanliqi yéngiliq bolmisimu, biraq bu xitay tenterbiye sépidiki bir xadimning tunji qétim xitayning rohlandurghuchi gormon ishlitidighanliqini pash qilishi. Mezkur weqening del london olimpik musabiqisining échilish murasimi küni ashkarilinishi diqqet qozghidi.

Xitay 1994‏-yili dunya su üzüsh musabiqiside 12 altun médalgha ériship, kütülmigen netije yaratqan. Biraq bu uning rohlandurghuchi gormon qollan'ghan bolushi mumkinliki heqqide keng guman peyda qilghan idi. Shu yili xiroshima asiya tenterbiye musabiqiside uning 7 neper su üzüsh mahirining rohlandurghuchi qollan'ghanliqi ashkarilan'ghan. Xitay shuningdin buyan özining bu xil heriketlerdin qolini üzgenlikini ilgiri sürüp kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet