Wén jyabaw xitayning teywen'ge qaritip qoyulghan bashqurulidighan bombilirining yötkep kétilishi mumkinlikini bildürdi

Xitay bash ministiri wén jyabaw teywen axbarat wasitilirining ziyaritini qobul qilip, xitayning teywen boghuzida orunlashturghan bashqurulidighan bombilirining yötkep kétilish mumkinchiliki barliqini bildürdi.
Muxbirimiz erkin
2010-09-24
Share

Wén jyabaw bu sözlerni b d t ning nyuyorktiki bash shtabida chaqirilghan b d t omumi qurultiyigha qatnishish jeryanida teywen axbarat wasitilirining bu heqtiki so'aligha jawab bergende tekitligen. U, ikki terep arisidiki munasiwetni yumshitishning, teywen boghuzi ikki qirghiqidiki xelqlerning arzusi we telipini eks ettürüdighanliqi we muxbirlargha otturigha qoyghan yuqiriqi mesilining "kelgüside emelge éshishi mumkin" likini bildürgen.

Xitay hökümiti 1990 ‏- yilliridin bashlap teywen boghuzigha mingdin artuq bashqurulidighan bomba orunlashturghan, shundaqla teywen musteqilliq jakarlisa qoral küchi ishlitidighanliqini agahlandurghan.  Lékin gomindang partiyisi teywende hakimiyet béshigha chiqqandin kéyin, teywen -xitay munasiwiti téz yumshashqa bashlap, ikki terepning siyasiy we iqtisadi alaqisi kücheygen.

Wén jyabawning yuqiriqi sözliridin kéyin, teywen bash ministiri wu dunyi buninggha inkas qayturup, teywen'ge qaritilghan bashqurulidighan bombilarni yötkep kétish bilen mesile hel bolmaydighanliqini bildürdi. U, "bashqurulidighan bombilarni élip kétish tehditning axirlashqanliqini körsetmeydu ... Lékin wén jyabawning sözi semimiylikning ipadisi" dégen.

Gomindang partiyisi hakimiyet béshigha chiqqandin kéyin, xitay kompartiye hökümiti bilen yéqinlishish siyasiti teywendiki musteqilliq telep qilidighan yerlik teywenliklerni qattiq bi'aram qilghan. Bu, yerlik teywenlikler bilen 1949 ‏- yili xitay chong quruqluqidin teywen'ge qéchip kelgen gomindangperes xitay puqraliri arisidiki bölünüshni jiddiyleshtürüwetken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet