Xitay torchilar amérika prézidénti obamadin erkinlik üchün yardem telep qildi

Xitay tor ezaliri yéqindin buyan amérika prézidénti barak obamaning tor bétige söz qaldurup, obamadin xitay xelqining erkinliki üchün yardem telep qilghan.
Muxbirimiz shöhret hoshur
2012.02.27

Amérika awazi radi'osining bügünki bu heqtiki xewiride bildürüshiche, xitay tor ezalirining adette bu torbetlerge kirishi cheklen'gen bolup, torchilar yéqindin buyan melum bir xil téxnikini qollinip prézidént obamaning torbétini ziyaret qilishqa muweppeq bolalighan. Ular qaldurghan sözliride, xitaydiki söz erkinliki, metbu'at erkinliki qatarliq mesililerde xitay xelqige yardem bérishini telep qilghan؛ hetta bezi tor ezaliri xitay xelqini qutquzushni telep qilghan.

Bügün xitay tashqi ishlar bayanatchisi, muxbirlarning bu heqtiki so'aligha duch kelgen. Xitay bayanatchi jawabida xitay hökümitining puqralarning söz erkinlikini qoghdawatqanliqini tekrarlighan. U yene puqralarning pikir bayan qiliwatqanda döletning qanun belgilimilirige boysunushi kéreklikinimu eskertken.

Muxbir bu témida bayanatchidin, puqralarning torda hökümetni tenqid qilishining qanun'gha xilap heriketliki yaki emeslikini sorighan. Xitay bayanatchi bu so'alni jawabsiz qaldurghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.