Xitay bash ministiri wén jyabaw 7 - öktebirdin bashlap türkiyini ziyaret qilidu

Xitay bash ministiri wén jyabaw 7 - öktebirdin bashlap türkiyini ikki künlük ziyaret qilidu. Wén jyabaw yéqinqi 8 yildin béri tunji qétim türkiyini ziyaret qilghan xitay bash ministiri bolupla qalmay, u yene türkiye bash ministiri erdoghan ötken yili ürümchi 5"‏ - iyul weqesi" de xitayni eyiblep, Uyghurlargha "irqiy qirghinchiliq" élip bérilghanliqini ilgiri sürgendin buyan, tunji qétim türkiyini ziyaret qilghan eng yuqiri derijilik xitay emeldari.
Muxbirimiz erkin
2010-10-04
Share

Shinxu'a agéntliqining eskertishiche, türkiye wén jyabawning 2‏ - öktebirdin 9 ‏ - öktebirgiche yawropadiki 4 dölette élip baridighan 7 künlük ziyaritining axirqi békiti bolup, u 7‏ - öktebirde türkiye ziyaritini bashlashtin burun grétsiye, bélgiye, italiyini ziyaret qilmaqchi idi. Nöwette wén jyabaw bélgiyini ziyaret qilip, bryussélda asiya - yawropa elliri bashliqlar yighinigha qatnashmaqta.

Gerche rejep tayyip erdoghan xitayni "irqiy qirghinchiliq" bilen eyibligen bolsimu, lékin shuningdin buyan xitay türkiye munasiwitide dramatik özgirish yüz bergen. Ikki döletning bardi - keldisi küchiyip, türkiyining ikki terep sodisidiki éksport hejimi jiddiy artqan. Shuningdin buyan türkiye hökümiti Uyghur mesilisini ashkara sorunlarda qayta tilgha élishtin özini qachuridighan bolup qalghan.

Bezi analizchilar wén jyabawning ziyaritide Uyghur mesilisining otturigha chüshidighanliqini ilgiri sürsimu, lékin analizchilar arisida türkiyining qandaq pozitsiye tutudighanliqigha qarita oxshimighan qarashlar mewjut. Bezi analizchilar türkiyining öz menpe'etni közlep, xitaygha hemkarlashquchi pozitsiye tutudighanliqini ilgiri sürse, yene bezi analizchilar Uyghur mesilisi muzakire qilinsila buning özi ijabiy ilgirilesh hésablinidighanliqini tekitlimekte.

Türkiyining xitayda turushluq bash elchisi murat sélim esenli, wén jyabawning ziyariti türkiye - xitay munasiwitini algha süridighanliqi we ikki dölet munasiwitining kélechikidin ümidwar ikenlikini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet