Yoqap ketken xitay öktichining qizi obamadin yardem soridi

Fransiye agéntliqidin melum bolushiche, amérika prézidénti barak obama koriyide échilidighan g -20 yighinida xitay re'isi xujintaw bilen uchrishidighan bolup, gawning qizi bu uchrishish aldida dadisining mesilisini otturigha qoyghan.

U, wal stért zhornilida élan qilin'ghan xétide mundaq dégen: "prézidént obama, sizmu ikki qizning dadisi bolush süpitingiz bilen xu jintawdin méning dadamning qeyerdilikini sürüshte qilip béqing. Elwette méning dadam peqetla bir adem. Emma shunisi manga ayanki, xitay hökümiti öz qanunini depsende qilishqa dawam qilidighanla bolsa, bundaq teqdir bashqa dadilarningmu béshigha kélidu."

Gaw jishingning qizi, dadisining béyjing da'iriliri teripidin tutup kétilgenlikini, özining kichik waqtida xitay saqchiliridin tayaq yigenlikini ashkarilighan.

Adwokat gaw jishing "junggoning wijdani" dep nam alghan bolup, u xitaydiki hökümet ziyankeshlikige uchrighan diniy zatlar we awam puqraning délosini ishligenliki üchün dawamliq halda xitay da'irilirining parakende qilishigha uchrap kelgen.
 
Gaw jishing 2006 - yili bir qétim "döletni aghdurushqa urunush" jinayiti bilen 3 yilliq qamaqqa höküm qilin'ghan. U jaza mudditini toldurup qaytip chiqqandin kéyin 2009 - yili, 2 - ayda saqchi da'iriliri uni qaytidin tutup ketkendin buyan uning qayta iz - dériki bolmighan.

Hazir gaw jishéngning mesilisi xelq'ara jem'iyet köngül bölidighan mesilige aylandi.