Xitay ürümchide 718 ademni jinayi ishlar boyiche resmiy qolgha alghanliqini élan qildi

Mezkur axbarat élan qilish yighinida, xitayning Uyghur élidiki jama'et xewpsizlik nazaritining mu'awin naziri shundaqla ürümchi jama'et xewpsizlik idarisi bashliqi chén ju'angwéy, 5 - iyul weqesidin kéyinki tutqun qilish herikiti üstide doklat bérip " 5 - iyul ürümchi weqesining tesir da'irisi keng, jinayet gumandarliri intayin murekkep arqa körünüshke, murekkep salahiyetlerge ige, nöwette merkezning biwaste yardimi bilen pütün memliket boyiche, jama'et xewpsizlik xadimlirini heriketlendürüp, jinayet gumandarlirini, süriti, sin alghu körünüshliri, barmaq izi, d n a analizliri qatarliq pakitlar arqiliq iz qoghlap tutush, éniqlashni kücheytiwatimiz " dégen.

B b s ning 4 - awghusttiki xewiride körsitishiche, xitay da'iriliri ürümchi weqesige munasiwetlik dep 718 kishini resmiy qolgha alghandin bashqa, 3 - awghust chüshtin kéyin ürümchi teptish mehkimisi 5 - iyul weqesi jinayet gumandarliri dep békitilgen yene 83 adem üstidin resmiy tutush buyruqi chiqarghan.

Xitay hökümitining 5 - iyul weqesi munasiwiti bilen tutqun qilin'ghanlar heqqide élan qiliwatqan sanliq melumatlirigha nisbeten chet'ellerdiki Uyghur teshkilatliri hemde xelq'ara axbarat organlirimu guman bilen qarimaqta, dunya Uyghur qurultiyi re'isi rabiye qadir weqedin kéyin 10 minggha yéqin Uyghurning iz ‏ - déreksiz yoqap ketkenlikini ilgiri sürmekte.