Хитай "5 - июл вәқәси" сәвәбидин 21 кишини җазалиған

Хитайниң уйғур аптоном райони даирилири җүмә күни үрүмчидә "5 - июл вәқәси" сәвәбидин 21 кишигә җаза елан қилинғанлиқини билдүргән. Шинхуа агентлиқиниң үрүмчи тәптиш даирилириниң сөзини нәқил кәлтүрүп хәвәр қилишичә, даириләр җазаланған бу кишиләрни от қоюш, адәм өлтүрүш, булаңчилиқ қилиш вә уруп - чеқиш қатарлиқ җинайәтләр билән әйиблигән.
Мухбиримиз әркин
2009.09.25

Лекин шинхуа агентлиқи җазаға тартилған 21 кишиниң ичидики пәқәт 8 кишиниң кимликини елан қилған болуп, қалған кишиләрниң кимликини тилға алмиған. Бу 8 кишиниң ичидики 6 кишиниң исмидин қариғанда буларниң уйғур икәнлики мәлум.

Шинхуа агентлиқиниң бу һәқтики хәвиридә әскәртилишичә, үрүмчи шәһәрлик тәптиш даирилири йәнә " үрүмчи вәқәсидә қолға елинған гумандарларни җазалаш ишлириниң давамлиқ елип берилидиғанлиқи"ни тәкитлигән. Лекин шинхуа агентлиқиға мәлумат бәргән бу тәптиш әмәлдари йәнә қанчилик адәмниң әйиблинидиғанлиқиға даир конкрет мәсилиләр тоғрисида учур бәрмигән.

Хитай мәтбуатлири илгири сақчи даирилириниң сөзини нәқил кәлтүрүп, "5 - июл вәқәси"дә рәсмий қолға елинғанларниң 1600 йетидиғанлиқини елан қилған болсиму, лекин кейинрәк үрүмчи шәһәрлик җ х идарисиниң башлиқи 718 нәпәр кишиниң рәсмий қолға елинғанлиқини елан қилған иди.

Үрүмчи шәһәрлик тәптиш мәһкимиси 8 - айдики бир баянатида қолға елинғанлар ичидин 83 кишиниң рәсмий әйиблинидиғанлиқини илгири сүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.