Xitayning '5 - iyul ürümchi weqesi'ni basturush jeryanida 1500 din artuq ademni qirip tashlighanliqi ilgiri sürülmekte

Xitay da'irilirining "5 - iyul ürümchi weqesi"ni basturush jeryanida 1500 din artuq ademni qirip tashlighanliqi ilgiri sürülmekte.
Muxbirimiz jüme
2010.01.30
Share on WhatsApp
Share on WhatsApp
Urumqi-xitay-piqaq-esker-qatil-305 Sürette, 14 - iyul, döng köwrük bazirining yénida, qorallirigha ötkür tighlarni békitip, uyghurlargha qarshi postta turghan xitay qoralliq saqchiliridin biri.
AFP Photo

Bu heqtiki xewerler "boshün" xewerler torida 30 - yanwar ashkarilan'ghan. Xewerde körsitilishiche, Uyghur élidiki xitay qoralliq saqchi qisim da'iriliri ürümchide Uyghurlarning namayish qilish xewirini 3 kün burun tapshurup alghandin kéyin, namayish ötküzülmekchi bolghan yol éghizlirida basturush teyyarliqi körgen.

Halbuki, namayishi hökümet da'iriliri perez qilghan liniyide élip bérilmighan bolghachqa, xitay da'iriliri deslepte amalsiz qilghan.

Xitay qoralliq saqchi qisimliri namayish yüz bergen orun toghrisida axbarat tapshurup alghan bolsimu, emma basturush buyruqi waqtida chüshmigechke, weqe yüz bergen rayon'gha ikki sa'et kéchikip yétip barghan.

Xewerde bu heqtiki uchurlarning munasiwetlik orunlardin élin'ghanliqi tekitlinip mundaq körsitilgen, "toluq qorallinip buyruq kütüp turghan qoralliq saqchi qisim, weqe yüz bergen rayonni derhal muhasire ichige alghan, kocha éghizliri, etraptiki binalarni toluq qamal qilghan we weqe yüz bergen meydandiki barliq Uyghurlarni neq meydanda qirip tügetken."

Xewerde otturigha qoyulushiche yene, minglighan qoralliq saqchi qisim eskerliri qisqa muddet ichide namayishchi Uyghurlarni qirip tügetkendin kéyin, derhal herbiy yük aptomobillarni chiqirip jesetlerni yötkep ketken we neq meydanni yuyup taziliwetken.

Xewerde boshün muxbirigha bu heqte uchur yetküzgüchi, weqede öltürülgen xitaylar sanining hökümet da'iriliri otturigha qoyghan sandin köp perqlenmeydighanliqi, emma shu küni étip öltürülgen Uyghur oghul - qizliri sanining 1500 din ashidighanliqini bildürgen.

Xitay da'iriliri 5 - iyul ürümchi weqesi yüz bergende Uyghur namayishchilarning 194 xitay puqrasini öltürgenliki we mingdin artuq ademning her xil derijide yarilan'ghanliqini ilgiri sürgen idi.

Gerche xitay da'iriliri bu küni peqet xitay puqraliriningla ziyan'gha uchrighanliqi we weqege chet'ellerdiki Uyghur teshkilatliri sewebchi ikenlikini otturigha qoyup kelmekte.

Halbuki, namayish guwahchiliri xitay eskerlirining namayishchilargha oq chiqarghanliqi we yene nurghun ademni qara - qoyuq tutup ketkenlikni bildürgen bolsa, dunya Uyghur qurultiyi 5 - iyul we uningdin kéyin qolgha élin'ghan Uyghurlar sanining 10 mingdin ashidighanliqini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.