قەشقەر ۋە خوتەنلەردە يېقىدا يۈز بەرگەن بىر قاتار ۋەقەلەرنىڭ 2009-يىلىدىكى «ئۈرۈمچى ۋەقەسى» بىلەن چېتىشلىقى بارلىقىنى ئىلگىرى سۈرگەن رابىيە قادىر خانىم: مەنچە بۇ قېتىملىق ھەرىكەتكە ئارىلاشقانلار، 2009-يىلىدىكى ئاشۇ ۋەقەلەردە ئۆلتۈرۈلگەن ئۇيغۇرلارنىڭ ئۇرۇق-تۇغقانلىرى بولۇشى مۇمكىن. «ئۈرۈمچى ۋەقەسى» بىر چوڭ ۋە ئېچىنىشلىق ۋەقە بولسىمۇ، ھېچكىم يېتەرلىك كۆڭۈل بۆلمىگەن ئىدى، دېدى.
رابىيە قادىر خانىم يەنە خىتاي دائىرىلىرىنىڭ 2009-يىلى 10 مىڭدەك ئۇيغۇرنى قولغا ئالغانلىقى، قولغا ئېلىشنىڭ ئۈزلۈكسىز داۋاملاشتۇرغانلىقى، ھازىر سانىنىڭ ئەسلىدىكى 10 مىڭدىن ھەسسىلەپ ئېشىپ كەتكەن بولۇشى مۇمكىنلىكىنى ئىلگىرى سۈردى.
رابىيە قادىر خانىم ئاخىرىدا مۇنداق دېدى: مەنچە خىتايلار ئۇيغۇرلارنى ئۆلتۇرۇشنى داۋاملاشتۇردى، لېكىن ئۇيغۇرلارمۇ توختاپ قالمايدۇ. ئۇلار، خىتاي سىياسىتىنى ئۆزگەرتمىگۈچە توختىمايدۇ.