Xitay 'gherbning kömürini sherqqe toshush' pilanini jiddiy emelge ashurmaqta

Bu yil "gherbning kömürini sherqqe toshush" pilani boyiche qumuldin 6 milyon tonna kömür toshulghan. Xitayning shinxu'a xewer torining xewirige asaslan'ghanda, xitayning "gherbning kömürini sherqqe toshush" pilanining asasliq bazisi hésablinidighan qumul wilayitide ötken bir yildiki kömür mehsulati 12 milyon tonnidin, sirtqa toshush miqdari 6 milyon 80 ming tonnidin ashurulghan.
Muxbirimiz ümidwar
2010.01.31
Share on WhatsApp
Share on WhatsApp
uyghur-eli-komur-bayliq-305 Sürette, uyghur élidin ichkiri ölkilerge poyiz wagunliri bilen toshulup kétiliwatqan kumur bayliqi.
AFP Photo

Bu sanliq melumatni qumul wilayetlik kömürchilik sana'itini bashqurush idarisi teminligen.

Shinxu'aning mezkur xewiride körsitilishiche, qumul wilayitidiki kömür zapisining omumiy miqdarining 570 milyard tonna ikenliki perez qilin'ghan bolup, bu pütün xitaydiki kömür zapisining 12.5% Ni teshkil qilidiken. Xitay hökümiti " gherbning kömürini sherqqe toshush" nami astida pilan tüzüp chiqqan bolup, ötken yili 2 - aydin bashlap, turpan - qumul oymanliqi asasliq kömür qézish bazisi qilip békitilgen hemde ötken yildin étibaren shendong, xongkong we bashqa jaylarning 30 nechche chong shirketliri bu jayning kömürchilik ishlirigha jelp qilin'ghan.

Qumul wilayiti 2010 - yili kömür qézishni téximu köpeytip, yilliq qézish mehsulat miqdarini 32 milyon tonnigha yetküzüsh, 2013 - yiligha barghanda, 197 milyon tonnigha yetküzüshni pilanlighan.

Xewerde éytilishiche, ötken yili yötkep kétilgen 6 milyon tonna kömürning 4 milyon 770 ming tonnidin köpreki poyiz bilen toshulghan. Shinjang - lenju tömür yolining ikkinchi liniye qurulushi pütkendin kéyin eslidiki bar liniye pütünley yük toshush yoligha özgertilidiken.

Xewerde, mezkur liniyining Uyghur élining kömür qatarliq yer asti bayliqlirini échish we yötkesh üchün zor derijide ilgirilitish rolini oynaydighanliqi tekitlen'gen.

Nöwette, "gherbning gézini sherqqe yötkesh" pilani ünümlük ishlewatqan bolup, turuba yoli arqiliq tarim wadisining tebi'iy gazliri xitayning ichki sheher we ölkilirini teminlimekte idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.