D u q bayanatchisi dilshat rishit: xitay jenubiy mongghuliyige qarighanda sherqiy türkistandiki Uyghurlardin téximu ensireydu

Dunya Uyghur qurultiyi bayanatchisi dilshat rishit bügün radi'omiz ziyaritini qobul qilip, mongghullar namayishi mezgilide, sherqiy türkistan weziyitining jiddiyleshkenlikini bildürdi. Dilshat rishit mundaq dédi:
“23-May jenubiy mongghuliyining shilin'ghol aymiqida bashlan'ghan mongghullar namayishidin buyan, xitay hökümet da'irilirining sherqiy türkistan'gha qaratqan kontrolluqni téximu kücheytti. Igilishimizche, hazir sherqiy türkistanning ürümchi, aqsu, qeshqer, ghulja qatarliq jaylirida, hökümet da'iriliri kochilardiki charlash saqchilirini körünerlik köpeytken. Xitay hökümiti rayondiki intérnét qamalini yenimu kücheytip, jenubiy mongghuliyide yüz bergen mongghullar namayishi heqqidiki xewerlerni cheklimekte. Mektep idare organlargha uqturush chüshürüp, oqughuchilar hem xizmetchi xadimlargha qaritilghan yoqlima hem nazaretni kücheytmekte. Körünüp turuptiki xitay hökümiti hazir sherqiy türkistandimu jenubiy mongghuliyide yüz bergendek naraziliq namayishining yüz bérishidin qattiq ensirimekte.”

Dunya Uyghur qurultiyi tünügün bergen bayanatida, xitay hökümet da'irilirining mushu ayning otturiliridin bashlap, aqsu wilayitining onsu nahiyiside 300 din artuq Uyghurgha qarita nuqtiliq nazaret élip bérip, 17-may küni 3 neper Uyghurni köchmen xitay shirketlirining rayonda Uyghurlarning yerlirini zorluq bilen igiliwalghanliqigha qarshi “Teshwiqat wereqisi tarqatti” dégen jinayet bilen eyiblep, qolgha alghanliqini bildürgen idi.