Wang léchu'en düshenbini ziyaret qildi

Wang léchu'en tajikistan prézidénti émam'eli raxman bilen körüshüp, ikki dölet hemkarliqliri heqqide söhbette bolghan hemde bir qatar kélishim hasil qilghan.

Tajikistanning asiya - plus agéntliqining ashkarilishiche, xitay bilen tajikistan alte xil kélishimge imza qoyghan bolup, bu kélishimlerning mutleq köp qisimi soda - iqtisad, zawut qurush we qurulush esliheliri hem éléktir istansiliri qurush qatarliq köp sahelerge munasiwetlik bolup, bulardin bashqa yene tajikistan penler akadémiyisi bilen Uyghur aptonom rayonluq pen - texnika komitétining hemkarliqigha a'it kélishimlermu hasil qilin'ghan.

Tajikistanning bedexshan rayonidiki murghabta xitay terep bilen birliship soda - qatnash nuqtisi qurush hemde xitay terep bilen tutishidighan tash yolni yasash qatarliq mesililerdimu pikir almashturulghan. Tajikistan agéntliqining ashkarilishiche, xitay terep bilen tajikistan terep yene birleshme uran qézish jehette hemkarlishish heqqidimu söhbet qilghan.

Xitayning tengri tagh torining xewiridimu wang léchu'en bashchiliqidiki Uyghur éli wekillirining tajikistanni ghelibilik ziyaret qilip, kélishimler hasil qilghanliqi melum qilin'ghan.

Ottura asiya agéntliqlirining xewer qilishiche, yéqindin buyan xitay qazaqistan, tajikistan qatarliq uran chiqidighan döletler bilen uran qézish saheside hemkarliq kélishimi hasil qilishqa tirishchanliq körsetmekte.

Biraq, tajikistan xewerliride wang léchu'en bilen émam'eli raxmanning sherqiy türkistan nami astidiki Uyghurlarning siyasiy heriketlirige birlikte zerbe bérish mesililirini yene muzakire qilghanliqi heqqide uchurlar yoq. Emma, ikki dölet bu sahede zich hemkarliqni dawamlashturiwatqanliqi melum.

Uyghur musteqilchilirige qattiq zerbe bérishni küchep teshwiq qiliwatqan wang léchu'enning düshenbe ziyaritidin ilgiri türkiye prézidénti abdulla gül tajikistan'gha kélip, bu dölet bilen siyasiy, iqtisadiy saheler boyiche kélishim hasil qilghan idi.