Xitay molla musa sayramining esirini ching sulalisi tezkiriliri qatarigha kirgüzüp, terjime qilmaqta

Yéqinda bay nahiyilik hökümet molla musa sayramining" tarixy hemidi " we "tarixiy eminiye" namliq ikki esirini xitay döletlik ching sulalisi tarixi eserlirini neshir qilish komitétigha yollap, uni ching sulalisi tarixiy tezkiriliri qatarigha kirgüzüp, xitay tiligha terjime qilip neshir qilishni telep qilghan hem buning üchün kop heriket qilghandin kéyin, shinxu'aning bu heqtiki xewiride bildürülüshiche, mezkur organ shinjang ijtima'iy penler akadémiyisige eserni xitay tiligha terjime qilishqa hawa qilghan. Hazir terjimisi ishliniwatqan bolup, kéler yili eserning xitayche nusxisi neshir qilinidiken.
Muxbirimiz ümidwar
2008.11.23

Melumki, molla musa sayrami bay nahiyiside yashap ötken yéqinqi zamandiki meshhur Uyghur tarixchisi, uning "tarixiy hemidi" we "tarixi eminiye" namliq kitabliri Uyghurlarning kéyinki ottura esirler we yéqinqi zaman siyasiy tarixini bilishte muhim menbe bolup hésablan'ghan bolghachqa, rusiye tarixchiliri 20 - esirning béshidila bu eserge alahide ehmiyet bergen idi.

Bu ikki kitab ilgiri kéyin ötken esirning 80 - yillirida hazirqi zaman Uyghur tilida neshir qilindi we ilim dunyasigha téximu bekrek tonulghan idi . Emma, munasiwetlik mutexessislerning eskertishiche, junggo alimliri bu eserning qimmitini ötken esirning 50 - yilliridila bilgen bolsimu, lékin idé'ologiyilik seweb tüpeylidin eserni neshir qilish hem terjime qilish ishlirigha izchil köngül bölmey kelgen iken. Démek, bu eser dunyagha kélip, bir esirdin artuq waqittin kéyin xitay tiligha terjime qilinish qararigha kelgen.

Elwette, molla musa sayrami öz esirni ching sulalisi tarixiy matériyalliri dep qarimighan bolup, u 19 - esirde aqsu, qeshqer we bashqa jaylarda yüz bergen menching sulalisigha qarshi keng kölemlik qozghilanglarni xatiriligen bolup, bu eser shu mezgildiki weqelerni hemde Uyghur diyarining ijtima'iy - siyasiy, iqtisadiy hem medeniy hayatini chüshinishtiki Uyghurlar özliri yézip qaldurghan muhim tarixiy menbedur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.