Бейҗиңдики қанун профессорлири әдлийидә ислаһат елип беришни тәләп қилди

Доклатта, хитайдики қанун-әдлийә системисиға өткән 4 йилда бир қисим түзитишләр киргүзүлгән болсиму, әмма буниң йетәрлик болмиғанлиқи, әдлийиниң мустәқиллиқини ишқа ашурушта техи нурғун негизлик мәсилиләрниң сақлинип ятқанлиқи оттуриға қоюлған.

Хитайниң қанун саһәсидики мутәхәссисләр доклатида, әдлийә системисида түптин ислаһат елип беришниң ачқучини-әдлийиниң мустәқиллиқиға капаләтлик қилиш, әдлийә вә партийиниң мунасивитини тәртипкә селиш, партийиниң әдлийиниң мустәқиллиқиға болған хата чүшәнчисини өзгәртиштин ибарәт, дәп көрсәткән.

Б б с ниң хәвәр қилишичә, мутәхәссисләр доклатида хитайдики әмгәк билән өзгәртиш түзүми мәсилисиниму тилға елип, бу түзүмниң җайларда әрздарларға зәрбә беридиған, пикир әркинликини боғидиған васитигә айландурулғанлиқини әскәртип, бу түзүмни дәрһал бикар қилишни тәләп қилған.

Хитайда йеңи рәһбәр алмишиш мәзгилидә хитайни сиясий ислаһат елип беришқа чақиридиған авазлар күчәйди. Ислаһат тәрәпдарлири йеңи рәһбәр ши җинпиң дөләт рәисликини тапшуруп алидиған бу мәзгилни хитайниң тәқдириниң бәлгилинишидә һәл қилғуч бир пәйт, дәп қаримақта.