Amérika xitaydin 'shinjang'diki sotlash ishlirida ochuq - ashkara bolushni telep qildi

Amérika tashqiy ishlar ministirliqi peyshenbe küni bayanat élan qilip, xitay da'iriliridin ötken yili yüz bergen "5 ‏- iyul weqesi"ge munasiwetlik sot ishlirida ochuq -ashkara bolushni telep qildi.
Muxbirimiz erkin
2010-01-29
Élxet
Pikir
Share
Print

Amérika tashqi ishlar ministirliqi yene, xitay da'irilirining "shinjang"diki sotni közitish toghrisidiki telipini ret qilghanliqidin ümidsizlen'genlikini bildürdi. Amérika tashqi ishlar ministirliqi bayanatchisi filip krowliy muxbirlargha mundaq dégen: "biz xitayni tutqundikilerge tutqan mu'amilide we sot jeryanida ochuq ‏- ashkara bolushqa chaqirimiz".

Ürümchi sheherlik ottura sot mehkimisi düshenbe küni yene 4 Uyghurgha ölüm jazasi bergen. Buning bilen ölüm jazasigha höküm qilin'ghan "5 ‏- iyul weqesi"ge munasiwetlik kishilerning sani 26 ge yetken bolup, ularning mutleq köpchiliki Uyghurlar idi. Xitay da'iriliri "5 ‏- iyul weqesi"de az kem 200 ademning ölgenliki, ölgenlerning köp qisimining xitaylarni asas qilidighanliqini ilgiri sürgen.

Dunya Uyghur qurultiyi xitayni weqede ölgen Uyghurlarning heqiqiy sanini yoshurush bilen eyiblep, ölgen Uyghurlarning sani xitay hökümiti élan qilghandin nechche hesse köp ikenlikini bildürgen.

Weqede zadi qanchilik ademning ölgenliki we iz ‏- déreksiz yoqalghanliqi hazirgha qeder melum emes. Xitay hökümiti deslepki mezgilde az dégende 1400 ademning qolgha élin'ghanliqini élan qilghan idi. Lékin dunya Uyghur qurultiyi iz ‏- déreksiz yoqalghanlarning nechche minggha yétidighanliqini, iz ‏- déreksiz yoqalghanlarning bezilirining öltürülgen bolushi mumkinlikini ilgiri sürüp, xelq'ara jama'etning tekshürüsh élip bérishini telep qilghan idi.

Toluq bet