Сәнкаку арилиға қарап илгирилигән тәйвән парахоти япон чарлиғучилар тәрипидин чекиндүрүлгән

Хитай билән японийә арисида сәнкаку арили җедили қайта сәһнигә чиққандин кейин, тәйвәнму дипломатик вә аммиви тәшкилат қанатлири арқилиқ сәнкаку арилиға болған игидарчилиқ тәлипини йәнә оттуриға қойди.
Мухбиримиз шоһрәт һошур
2010-09-14
Share

Түнүгүн, тәйвән ташқи ишлар министири японийигә наразилиқ билдүрүп, сәнкаку арили игилик һоқуқиниң өзлиригә тәвә икәнликини билдүргән вә 100 гә йеқин тәйвәнлик японийиниң тәйбейдики ғәйрий рәсмий әлчиханиси алдида наразилиқ намайиши өткүзгән иди.

 Бүгүн йәни сәйшәнбә күни әтигәндә, бәш кишилик бир гуруппа бир белиқчи парахотиға чиқип, бир түркүм тәйвән деңиз чарлиғучилириниң һимайисидә, сәнкаку арилиға йүрүш қилған. Тәйвән белиқчи парахоти сәнкакуға йеқинлашқанда, япон чарлиғучи парахоти уларни чекиндүрүш үчүн һәрикәткә өткән. Нәтиҗидә тәйвән парахоти сәнкаку арилиға кирәлмигән.

Арқисиға чекинишкә мәҗбур болған тәйвәнлик белиқчилар өз тор бетидә баянат елан қилип, тәйвән деңиз чарлиғучилириниң япон чарлиғучилириға тәң келәлмигәнликини, шуңа арқисиға чекингәнликини билдүргән.

Тәйвәнниң деңиз чарлиғучи қисимлири болса, өз мәқситиниң пәқәт игилик һоқуқ тәлипини билдүрүп қоюш икәнликини, шуңа сәнкаку арилиға кирәлмигән болсиму, мушу қетимлиқ вәзиписини ада қилип болғанлиқини билдүргән.

Бүгүн хитай ташқи ишлар баянатчиси, японийә тәрәп тутуп туруватқан хитай белиқчи парахот капитанини дәрһал қоюп беришни йәнә бир қетим тәләп қилған. японийә түнүгүн, өткән һәптә тутувелинған хитай белиқчи парахотидики 13 кишини қоюп бәргән, бирақ парахотниң капитанини техичә қоюп бәрмигән иди.

Хәвәрләрдин қариғанда, қануний тәртип бойичә, хитай капитан, японийидә 19 ‏- сентәбиргә қәдәр тутуп турулуши мумкин.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.