Хитай аз учрайдиған қиммәтлик мәдәнләрни японийигә експорт қилишни тохтатқан

Хитайдин чиқидиған бу хил мәдәнләрниң 50 пирсәнтини японийә импорт қилидиған болуп, бу хил мәдәнләр компютер қаттиқ детали, алий сүпәтлик кондуктор (өткүзгүч), йеқилғу теҗәшлик електир аптомобили, янфон вә башқа юқири техникилиқ мәһсулатларни ишләпчиқиришта ишлитилидикән.

Бирләшмә агентлиқиниң хәвәр қилишичә, японийә сода орунлири бу хил мәдәнләрни японийигә тошушниң тохтитилғанлиқи һәққидә хитай тәрәптин уқтуруш тапшурувалғанлиқи, лекин хитай тәрәп буниң сәвәбини чүшәндүрмигәнликини билдүргән.

Японийиниң бир сода орни "аз учрайдиған мәдәнләрни експорт қилишниң сәйшәнбә күндин башлап тохтитилғанлиқи, лекин буниң қачан әслигә келидиғанлиқи мәлум әмәслики"ни тәкитлигән.

Японийә сода министири охата, аз учрайдиған бәзи мәдәнләрни японийигә експорт қилишниң тохтитилғанлиқидин хәвәр тапқанлиқи, лекин хитай һөкүмитидин буниңда даир рәсмий уқтуруш тапшурувалмиғанлиқини билдүрди.

Японийә сода саһәсидики бәзи даириләр, хитайниң 2010‏ - йили ичидә дуняға аз учрайдиған мәдәнләрдин 30 миң тонна експорт қилишни бәлгилигәнлики, буниң 9 - айниң ахирлири тошқанлиқини билдүрсиму, лекин бәзи анализчилар буниң хитай-японийә мунасивити җиддийлишип кәткән мәзгилгә тоғра кәлгәнликини әскәртмәктә.