Японийигә қарши намайишта 'чирикликкә қарши туруш' шоари мәйданға чиққан

Хитайда давамлишиватқан японийигә қарши наразилиқ намайишлири йәкшәнбә күни уйғур дияри билән чегрилинидиған гәнсу өлкисиниң ләнҗу шәһиригә йетип кәлгән.
Мухбиримиз үмидвар
2010.10.24

Рейтерс агентлиқиниң хәвәр қилишичә, ләнҗу шәһиридә 200 әтрапида намайишчи өз һөкүмитини японийигә қарши турушқа чақирип, наразилиқ намайиши өткүзгән. Намайишчиларниң мутләқ көп қисими яшлар икән.

Бу күни йәнә, бавҗи шәһридиму намайиш йүз бәргән. Бирақ, бавҗидики намайишчиларниң тиғ учи японғила әмәс, бәлки чирик бийократларғиму қаритилған. Әнглийә б б с агентлиқиниң японийә мәнбәлиридин нәқил кәлтүрүшичә, бавҗидики намайишта "бийократларға қарши турайли, чирикликкә қарши турайли" дегән хәтләр йезилған лозункилар көтүрүлгән. Бавҗидики намайишчилар йәнә "юқири өй баһасиға қарши турайли" дегән көк рәңлик лозунка билән "көп партийә һәмкарлиқини илгирилитәйли" дегәндәк йешил рәңлик лозункиларни көтүргән икән.

Тәһлил қилинишичә, японға қарши намайишларда мәзкур лозункиларниң пәйда болушидин кейин, бәлки бейҗиң даирилири буниңдин кейин өткүзүлидиған японға қарши намайишларға нисбәтән сәгәклик билән муамилә қилип, униң ички мәсилиләргә қарши намайишқа айлинип кетишиниң алдини елишини мумкин икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.