Yaponiye xitaygha yéqin aralgha herbiy qoshun ewetmekchi
2010.11.21
Roytérs agéntliqining xewer qilishiche, yaponiye hökümiti özini qoghdash küchlirining 100 neper herbiy xadimini teywendin 110 kilométir, xitay bilen yaponiye arisida talash-tartish üstide turiwatqan sénkako arilidin 160 kilométir nérigha jaylashqan yonaguni ariligha ewetishni qarar qilghan. Bu pilan 2014-yili etrapida emeliyleshtürilidiken. Eger shundaq bolsa, bu yaponiyining tunji qétim xitaygha yéqin déngiz rayonigha jaylashqan arallargha öz herbiy qoshunini orunlashturushi bolup hésablinidiken.
Yonaguni arili tinch okyandiki okinawa tewesige jaylashqan bolup, okinawa yaponiyining bir rayoni bolsimu, emma, bu yerde amérikining tinch okyan qisimlirining herbiy bazisi bar shuningdek yene mezkur jayda 2100 etrapida yapon eskirimu orunlashqan.
Buningdin ilgiri yaponiye bilen xitay arisida sénkako arili etrapida paraxot soqushup kétish weqesi yüz bergendin kéyin, ikki dölet arisidiki ixtilap kücheygen. Xitay we yaponiyide bir-birige qarshi naraziliq namayishliri élip bérilghan idi. Yaponiye izchil türde sherqiy déngizdiki sénkako arilini öz zémin da'irisi ichige kirgüzüp kelgen bolup, xitay terep bolsa, bu rayonlarning öz teweliki da'irisi ichide ikenlikini bildürgen idi.