Xitay Uyghur élida yingne hujumi gumandarliridin 74 kishini qolgha aldi

Shinxu'a torining bu heqtiki xewiride bildürülüshiche, saqchi da'iriliri bu jeryanda, yingne hujumi guruhidin 7 ni, yingne bilen hujum qilish délosidin 36 ni pash qilghan. Bu délolardin 16 si ürümchide, 11 i xotende yüz bergen, qalghanliri qeshqer, turpan, aqsu, sanji we altay qatarliq jaylarda yüz bergen.

Radi'omizning igilishiche yene, Uyghur élining qaramay, shixenze we küytüng qatarliq sheherliridimu yingne hujumi weqesi yüz bergen. Qaramay ahaliliridin biri radi'omiz muxbirigha qarimay sheherlik hökümetning yerlik axbarat wastiliri arqiliq sheherde yingne bilen hujum qilish délosidin 49 i pash qilin'ghanliqini uqturghan.

Teywen axbarat wastilirining bildürüshiche, yingne bilen hujum qilish weqesi xitayning shi'en qatarliq sheherliridimu körülgen. Shi'en sheherlik saqchi idarisi yingne hujumchilirini tutush üchün, 5000 neper saqchini heriketke keltürgen.

Nöwette xitay, yingne hujumida zeherlik maddilar qollinilmighanliqini xewer qilip weziyettiki ensizchilikni peseytishke tirishsa؛ yene bir tereptin yingne hujum weqesining kéngiyiwatqanliqini bildürüp, xitay xelqini segek bolushqa chaqirmaqta.