خىتايدا بۇ يىل كىرگەندىن بېرى 260 بالا ئېغىز - بۇرۇن ياللۇغىدا ئۆلدى

خىتاي ھۆكۈمىتى جۈمە كۈنى خىتايدا بۇ يىل كىرگەندىن بۇيان 260 بالىنىڭ ئېغىز - بۇرۇن ياللۇغىدا ئۆلگەنلىكىنى، بۇ ۋىرۇس بىلەن ئاغرىغان بالىلارنىڭ سانىنىڭ نەچچە يۈز مىڭغا يېتىدىغانلىقىنى ئېلان قىلدى.
ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ
2010.05.07

خەۋەرلەردە ئەسكەرتىشىچە، ئېغىز - بۇرۇن ياللۇغى خىتايدا ھەر يىلى ئەتىياز ۋە ياز پەسلىدە باش كۆتۈرىدىغان كېسەللىك بولسىمۇ، لېكىن مەزكۇر كېسەللىك ئۆتكەن يىلغا قارىغاندا، بۇ يىل بالدۇر باشلانغان.

"بېيجىڭ خەۋەرلەر" گېزىتىنىڭ خەۋىرىدە، خىتاي سەھىيە مىنىستىرلىقى يۇقۇملۇق كېسەللىكلەرنى كونترول قىلىش ۋە ئالدىنى ئېلىش ئىدارىسىنىڭ مۇئاۋىن مۇدىرى شياۋ دۇڭلۇنىڭ سۆزىنى نەقىل كەلتۈرۈپ، بۇ يىل كىرگەندىن بۇيانقى 5 ئايدا مەزكۇر كېسەللىك سەۋەبىدىن ئۆلگەن بالىلارنىڭ سانى ئۆتكەن يىلنىڭ ئوخشاش مەزگىلىدىن 143% ئېشىپ كەتكەنلىكىنى بىلدۈرگەن.

بۇ ھەقتىكى خەۋەرلەردە، مەزكۇر كېسەللىكنىڭ گۇاڭدۇڭ ۋە گۇاڭشىلاردا كەڭ تارقالغانلىقىنى ئىلگىرى سۈرمەكتە. لېكىن ئۇيغۇر ئاپتونوم رايونىدىكى ئاخبارات ۋاستىلىرىدا بولسا، مەزكۇر كېسەللىكنىڭ رايوندا بۇ يىلقى تارقىلىش ئەھۋالىغا دائىر خەۋەرلەرنى ئۇچراتقىلى بولمىدى.

شياۋ دۇڭلۇ بۇ كېسەللىك نورمالدا 5 ‏- ۋە 7 - ئايلاردا كەڭ تارقىلىدىغان كېسەللىك بولسىمۇ، لېكىن بۇ يىل 4‏ - ئايدىلا يۇقىرى پەللىگە چىققانلىقىنى ئەسكەرتىپ، 430 مىڭ بالىنىڭ مەزكۇر كېسەللىك ۋىرۇسىدا ئاغرىغانلىقىنى بىلدۈرگەن.

خىتاي سەھىيە مىنىستىرلىقىنىڭ ئاشكارىلىشىچە، 2009‏ - يىلى خىتايدا مەزكۇر كېسەللىك سەۋەبىدىن 353 بالا ئۆلگەن.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.