شىنخۇا ئاگېنتلىقى بۇ ھەقتىكى بىر خەۋىرىدە ئەسكەرتىپ، خىتايدا ھازىرغا قەدەر بايقالغان ئەيدىز ۋىرۇسى يۇقۇمدارى ۋە ئەيدىز كېسىلى بىمارلىرىنىڭ 346 مىڭ ئىكەنلىكىنى بىلدۈرگەن بولسىمۇ، بىراق خەلقئارا ئەيدىز مۇتەخەسسىسلىرى بۇ يىلنىڭ ئاخىرلىرىغىچە ئەيدىز بىمارلىرى ۋە يۇقۇمدارلىرىنىڭ 780 مىڭغا يېتىدىغانلىقىنى ئىلگىرى سۈرگەن.
بەزى كۆزەتكۈچىلەر، ئۇيغۇر ئېلىدىكى ئەيدىز يۇقۇمدارى ۋە بىمارلىرىنىڭ سانى مەسىلىسىدىمۇ، خىتاي ھۆكۈمىتى ئېلان قىلغان سانلىق مەلۇمات بىلەن خەلقئارا مۇتەخەسسىسلەر پەرەز قىلغان سانلىق ستاتىستىكا ئارىسىدا زور پەرق بارلىقىنى ئىلگىرى سۈرىدۇ.
خىتاي ھۆكۈمىتى ئۇيغۇر ئېلىدە ئەيدىز يۇقۇمدارى ۋە بىمارلىرىنىڭ 32 مىڭ ئەتراپىدا ئىكەنلىكىنى ئېلان قىلغان. بىراق خەلقئارا مۇتەخەسسىسلەر بۇنىڭدىن 60 مىڭدىن كۆپ ئىكەنلىكىگە ئىشىنىدۇ.
مۇتەخەسسىسلەرنىڭ ئىلگىرى سۈرۈشىچە، خىتايدا ئەيدىز ۋىرۇسى يۇقۇمدارى ۋە ئەيدىز كېسىلى بىمارلىرىنىڭ 56 % ئى ئۆزىنىڭ مەزكۇر ۋىرۇسىدىن يۇقۇملانغانلىقى ياكى ئەيدىز كېسىلىگە گىرىپتار بولغانلىقىدىن خەۋەرسىز ئىكەن.
ئانالىزچىلار، خىتاي دىكى بىمار ۋە يۇقۇمدارلىرى ھۆكۈمەت ۋە جەمئىيەتنىڭ كەمسىتىشىدىن قورقۇپ ئۆزىنى مەلۇم قىلىشتىن قاچىدىغانلىقى، بىراق بۇ ئەيدىزنىڭ ئىلگىرىلەپ يامرىشىغا تۈرتكە بولۇۋاتقانلىقىنى ئىلگىرى سۈرمەكتە.