Хитайда хизмәтчи қобул қилишта очуқ ашкара һалда ирқи айримичилиқ сиясити йүргүзүлмәктә

Хитай йәрлик даирилири хизмәтчи қобул қилишта очуқ ашкара һалда ирқи айримичилиқ сиясити йүргүзүп келиватқан болуп, җәнуби хитай сәһәр гезитидә көрситишичә, бу хил әһвал уйғур елидә бир қәдәр еғир икән.
Мухбиримиз җүмә
2010-02-27
Елхәт
Пикир
Share
Принт

Хәвәрдә ашкарилинишичә, 2007 - йили елан қилинған бир хизмәтчи қобул қилиш еланида уйғур җамаәтчилики бир қәдәр көпийиватқан йиву қатарлиқ шәһәрлиридики сақчиханиларға уйғурларниң ишлирини бир тәрәп қилидиған сақчи қобул қилинидиғанлиқи, әмма хизмәт орниға уйғурчини раван сөзләйдиған хитай кандидатларниңла қобул қилинидиғанлиқи көрситилгән.

Мәлум болушичә, бу еланниң мәзмунлири техи йеқинда ашкариланған. Җәнуби хитай сәһәр гезити бу һәқтә елип барған тәкшүрүшкә қариғанда, мәзкур хизмәт орунлириға дегәндәк уйғурчә билидиған хитай сақчилар қобул қилинған.

Хәвәрдә юқириқи елан мисал қилинип, хитай йәрлик даирилири мәйли уйғур елидә болсун вә мәйли уйғур елиниң сиртидики уйғурларға мунасивәтлик хизмәт орунлириға болсун хизмәтчи қобул қилишта ирқи айримичилиқ сияситини ашкара һалда йүргүзүп келиватқанлиқи көрситилгән.

Хәвәрдә нәқил қилинишичә, уйғур қиз анар 2007 - йили оқуш пүттүргәндин кейин уда нәччә йил сақчи болуш үчүн имтиһанларға қатнашқан болсиму даим өтәлмигән. Әмма униңға өтәлмәслик сәвәби чүшәндүрүлмигән.

Мәлум болушичә, 2007 - йили уйғур елидә 566 нәпәр сақчи қобул қилинидиғанлиқи, буларниң 265 нәпириниң чоқум хитай болуши керәклики, пәқәт йүз нәпәргә йеқин уйғур қобул қилинидиғанлиқи, қалғанлириниң башқа милләтләргә қалдурулғанлиқи елан қилинған.

Хәвәрдә көрситишичә, җуңго сиясий қанун университети профессори сәй диңҗйән хитай асасий қанунида хизмәтчи қобул қилиш еланлириға кандидатларниң милләт тәркибини ениқ йезиш чәкләнгәнликини илгири сүргән.
 
 
Пикирләр (0)
Share
Толуқ бәт