Xitaydiki ishsizliq nisbitining hökümet statistikisidin bir hesse yuqiriliqi ilgiri sürüldi

11-Dékabir küni xitayning hökümet axbarat wasitiliridin biri “Xelq tori” da, xitayning 2012-yilliq ishsizliq nisbiti 4.1% Dep élan qilindi. Xewerde yene Uyghur rayonining bu yilliq ishsizliq nisbitining 2.86% Bolghanliqi bayan qilinip, Uyghur rayonining xitayda ishsizliq nisbiti eng töwen orun ikenliki ilgiri sürülgen.

Xewerde “Bu yil shinjangning ishqa orunlishish weziyiti muqim, sheher bazarlarda 400 ming kishi menpe'etdar boldi” dégen bayanlar bérilip, 2012-yili Uyghur aptonom rayoni teweside 51 ming 400 adem ishqa orunlashturulghanliqi ilgiri sürüldi.

Emma fransiye radi'osi xitay bölümining 11-dékabir oxshash kündiki xewiride chéngdu gherbiy jenub maliye uniwérsitétidiki tetqiqatchi genlining xitaydiki 8000 a'ilini tekshürüp istatéstika qilish arqiliq chiqarghan yeküni élan qilinip, xitayda 2012-yili 6-ay mezgilidiki sheher-bazarlardiki ishsizliq nisbiti 8.05% Ke yétip, 2011-yili 8-ay mezgilidikidin 8% ashqanliqi, buning hökümet élan qilghan xitaydiki ishsizliq nisbiti 4.1% Dégen melumattin bir hesse yuqiriliqi tekitlendi.

Fransiye radi'osining xewiride yene amérikidiki xitay tetqiqatchisi bay méyshinning sözi neqil élinip, “Eger tetqiqatchi genlining xitaydiki ishsizliq nisbiti heqqidiki tekshürüsh doklatidiki sanliq melumatqa asaslan'ghanda, xitaydiki sheher bazarlardiki ishsizlar sani 4 milyon'gha yétishi mumkin” dégen bayanlar bérilgen.