Хитайлар җүмә күни үрүмчидә йәнә намайиш қилип, ваң лечүәнниң истипа беришини тәләп қилди

Үрүмчи шәһиридики көчмән хитай аһалиси җүмә күни йәнә намайиш қилип, уйғур аптоном райони парткоминиң секритари ваң лечүәнни истипа беришкә чақирған. Шу күни тәхминән 1000 кишилик хитай намайишчилар қошуни үрүмчи шәһәрлик партком алдидики җәнуби көл мәйданиға топлинип, даириләрниң хитай көчмәнлириниң бихәтәрликини қоғдалмиғанлиқини, шуңа ваң лечүәнниң истипа беришини тәләп қилған.
Мухбиримиз әркин
2009.09.04

Хәвәрләргә қариғанда, хитай намайишчилар үрүмчи шәһириниң уйғурлар олтурақлашқан районлириға қарап меңип, җәнубий шинхуа йоли тәрәпкә қайрилғанда хитай бихәтәрлик күчлириниң мудахилисигә учриған, сақчилар намайишчиларға яш аққузуш бомбиси атқан.

Б б с ниң хәвәр қилишичә, үрүмчи шәһириниң муавин шәһәр башлиқи җаң хуң пәйшәнбә күни йүз бәргән үрүмчидики вәқәдә 5 адәмниң өлгәнликини вә 14 адәмниң яриланғанлиқини билдүргән. Җаң хуң өлгән вә яриланғанларниң миллитини тилға алмиған. Радиомизға кәлгән инкасларда,хитай намайишчиларниң кочида кетиватқан уйғурларға һуҗум қилғанлиқи илгири сүрүлгән иди.

Бәзи хәвәрләрдә, намайишчиларниң хитай даирилирини "5 ‏- июл вәқәси"дә қолға елинған уйғурларни вақтида җазалимай вақитни кәйнигә сүрүш билән тәнқид қилғанлиқи, намайишчиларниң уйғурлар билән болған мәсилини "өз алдиға һәл қилмақчи" болуватқанлиқи илгири сүрүлгән.

Шинхуа агентлиқи бу һәқтики хәвиридә, җүмә вә пәйшәнбә күни йүз бәргән намайишларға "зәһәрлик йиңнә гуруһи"ниң сәвәб болғанлиқини, йеқинқи икки айда "зәһәрлик йиңнә "һуҗумиға учриған пуқраларниң аз кәм 500 гә йетидиғанлиқини билдүргән.

Лекин хитай һөкүмити яки мәтбуати түнүгүнгә қәдәр "зәһәрлик йиңнә гуруһи"ға даир һечқандақ хәвәр берип бақмиған иди. Үрүмчидики намайиш вә "зәһәрлик йиңнә" һуҗуми һәққидики хәвәр үрүмчидики бир башланғуч мәктәпниң уйғур оқуғучилириға зәһәрлик ваксина селип, нурғун балиларниң зәһәрлинишини, бир қисим балиларниң өлүшини кәлтүрүп чиқарған мәзгилдә йүз бәргән. 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.