خىتاي كىشىلىك ھوقۇق پائالىيەتچىلىرىنى باستۇرۇش بىلەن ئەيىبلەندى

ناۋى پىللاي بۇ ھەقتىكى پىكىرلەرنى بىرلەشكەن دۆلەتلەر تەشكىلاتى كىشىلىك ھوقۇق كېڭىشىنىڭ كۈزلۈك يىغىنىدا ئوتتۇرىغا قويدى. ئۇ، خىتايدىكى كىشىلىك ھوقۇق پائالىيەتلىرىنىڭ باستۇرۇلۇش ئەھۋالى ئۈستىدە توختىلىپ، خىتاينى كىشىلىك ھوقۇق پائالىيەتچىلىرىنى جىمىقتۇرۇش ۋە باستۇرۇش بىلەن ئەيىبلىدى.

پىللاي سۆزىدە يەنە، رۇسىيىدىكى ئۆلتۈرۈلگەن ژۇرنالىستلار مەسىلىسى ئۈستىدىمۇ توختىلىپ، رۇسىيىنى بۇ ژۇرنالىستلارنىڭ قاتىلىنى تېپىشقا ۋە قانۇن بويىچە بىر تەرەپ قىلىشقا چاقىردى.

رويتېرس ئاگېنتلىقىنىڭ خەۋەر قىلىشىچە، پىللاي سۆزىدە خىتاي، بېلوروسىيە ۋە تۇنىس قاتارلىق بىر قىسىم دۆلەتلەرنىڭ قانۇن ۋە تۈرلۈك قائىدە - نىزاملار ئارقىلىق ئاممىۋى تەشكىلاتلارنىڭ پائالىيەتلىرىنى قاتتىق چەكلەۋاتقانلىقىنى، ئانگولا، زىمبابۋﯤ قاتارلىق دۆلەتلەردە جۇرنالىستلارنىڭ تەھدىتكە ئۇچراۋاتقانلىقىنىمۇ تىلغا ئالغان.