Lyentang kentidiki ahalilerning namayishi sheherlik hökümet aldighiche ilgirilidi

Da'iriler bergen wedilirige emel qilmighandin kéyin, naraziliq namayishi téximu ulghiyip, namayishchilar bügün yeni düshenbe küni chüshtin burun shentu sheherlik hökümetning aldigha toplan'ghan.

10Mingdin artuq kishi sheherlik hökümet aldida tizlinip olturup, hökümetke naraziliqini ipadiligen. Eslide lyentang kentidiki ahaliler, kentte sétiwétilgen yerlerni sürüshte qilip, da'irilerge iltimas sun'ghan. Da'iriler sétiwétilgen yerler heqqide hésab bérelmigendin kéyin, kent ahaliliri topliship naraziliq herikiti bashlighan. Radi'omiz xitayche bölümining xewer qilishiche, bügün sheherlik hökümet aldigha toplan'ghan namayishchilar, “Yerlirimizni qayturup ber”, “Puqraliq hoquqimizni qayturup ber” dégen sho'arlar yézilghan lozunkilarni kötürgen we namayish meydanida mushu xil sho'arlarni towlighan.

Melum bolushiche, namayish dawamida sheherlik hökümetning bir katipi otturigha chiqip söz qilip, otturigha qoyulghan mesilige 3 ay ichide jawab béridighanliqini éytqan. Emma namayishchilar katipning bu sözlirige qayil bolmighan we sheherlik hökümet sékrétarining jawab bérishini telep qilghan. Melum bolushiche namayish bügün sa'et ikkige qeder dawam qilghan.