Xitayda zeherlik chékimlik etkeschiliki bilen eyiblen'gen 4 neper pakistanliq we afghanistanliqqa ölüm jazasi bérilishi mumkin

Jüme künki xewerlerde xitayning shénjin tamozhna da'iriliri teripidin zeherlik chékimlik etkeschiliki bilen eyiblinip qolgha élin'ghan 2 neper pakistan puqrasi bilen 2 afghanning ölüm jazasigha höküm qilinish éhtimali barliqi bildürüldi.
Muxbirimiz erkin
2010-01-01
Share

Bu heqtiki xewerlerde, yuqiriqi 4 neper pakistanliq we afghanning yéqinda 5.144 Kilogram xéro'in bilen shénjén tamozhnisida qolgha chüshkenliki, bu xitay tamozhna da'iriliri yéqinqi bir qanche yildin béri pash qilghan miqdari eng köp xéro'in etkeschiliki bolup hésablinidighanliqi bildürülgen.

Xitay metbu'atlirining xewer qilishiche, xitay tamozhna da'iriliri ötken yili pakistandin shinjén'gha yollan'ghan 2 wagon malning ichide xéro'in barliqigha da'ir axbarat tapshuruwalghan bolup, saqchilar bu uchurgha asasen wagondiki 5.144 Kilogram xéro'inni bayqighan shundaqla 9 ‏ - ayda xitay tewelikidiki bir ayalning hemrahliqida malni tapshuruwalghili kelgen chet'ellikni qolgha alghan. Mezkur délogha chétilip qolgha élin'ghanlarning sani jem'iy 9 neper bolup, ularning ichidiki 2 pakistanliq, 2 afghanni öz ichige alghan 4 kishi chet'ellik idi.

Bu weqe 2007 ‏ - yili ürümchide 4 kilogram xéro'in bilen tutulup qélip, ölüm jazasi bérilgen hindi qan sistémisidiki en'gliyilik akmel shayikning ölüm jazasi ijra qilinip 2 kündin kéyin élan qilindi. En'gliye xitayni akmelning mesiliside "kishilik hoquqning asasi prinsipini depsende qilish" bilen eyibligen.

Fransiye agéntliqi bu heqtiki xewiride, xitay hökümitidiki weziyettin xewerdar shexslerning sözini neqil keltürüp, 2004 ‏ - yildin bashlap xitaygha kiridighan xéro'inning kélish menbesi altun uch burjek rayonidin afghanistan'gha yötkelgenlikini, afghanistanda ishlepchiqirilghan xéro'inning ichkiridiki gu'angju, shénjén, shangxeylerde sétilipla qalmay, ürümchi, chungching we chéngdulardimu sétiliwatqanliqini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet