Xitayda turushluq chet'ellik muxbirlar xitayning metbu'at erkinlikini qoyuwétishini telep qildi

Ular bayanatida, xitayda olimpik mezgilide axbaratqa bolghan qamal azraq yumshitilghan bolsimu, emma olimpik ötüp ketkendin kéyinla chet'ellik muxbirlarni teqip qilish we tehdit qilish weqelirining yene artishqa bashlighanliqini bildürgen.

Ular bayanatida yene, "xitay hökümet da'iriliri chet'ellik muxbirlarnila emes, belki ularning jonggo puqrasi bolghan yardemchilirinimu parakende qilip, tehdit séliwatidu " dégen.

B b s ning bu heqtiki xewiridin melum bolushiche, xitay da'iriliri chet'el muxbirlirining yardemchilirini chaqirtip ekilip soraqqa tartip, chet'ellik muxbirlarning néme toghriliq xewer yéziwatqanliqini sürüshtürgen. Bezi waqitlarda muxbirlar sirtlarda ziyaret élip bériwatqanda, yerlik hökümet da'irilirining ademliri ularni teqip qilip, ziyaret jeryanini küzitip turidighan bolup, bu xil ehwallar chet'el muxbirlirini wehimige salmaqta iken.

Melum bolushiche, yéqinda xitayda iqtisadqa a'it xewerlerni yazidighan chet'ellik muxbirlar "dölet mexpiyetlikini ashkarilash" bilen tehditke uchrighan bolup, ular bayannamisida xitay hökümitining zadi némining dölet mexpiyetliki bolidighanliqi heqqide éniq chüshenche bérishini telep qilghan.

Merkizi nyuyorkta turushluq muxbirlarni qoghdash jem'iyitimu bu yil 2 - ayda doklat élan qilip, xitayning axbarat erkinliki mesiliside wediside turmighanliqini, xitayning uchur - axbaratqa bolghan qamalni qoyup bérish emes, eksiche téximu kücheytiwetkenlikini bildürgen idi.