Xitay qazaqlargha yene zor miqdarda qerz pul bérishke qoshulghan

Qazaqistandiki eng chong mis kanchilik shirketliridin biri bolghan qazaqmis shirkitining charshenbe küni élan qilishiche, xitayning bir bankisi qazaqistan milli meblegh fondi - samruk kazina bilen birliship, qazaqmis kanchiliq shirkitige ikki milyard 700 milyon dollar qerz pul bérishke qoshulghan.
Muxbirimiz erkin
2009-12-30
Élxet
Pikir
Share
Print

Fransiye agéntliqining bu heqtiki xewiride qerz pulning bir qisimining qazaqistan milli meblegh igilik fondidin bérilidighanliqini, qalghan qisimini xitay tereqqiyat bankisi teminleydighanliqini bildürgen. Qazaqmis shirkiti london xelq'ara paychék bazirida tizimgha aldurulghan shirketlerning biridur.

Xitay yéqinqi yillardin béri qazaqistan bilen türkmenistanning tebi'iy gaz we tebi'iy bayliqigha meblegh sélishni jiddileshtürgen. Xitay bu yilning bashlirida qazaqistan'gha 10 milyard dollar qerz puli béridighanliqini élan qilipla qalmay, türkmenistanning yol'öten tebi'iy gaz néfitlikini échishqa shérik bolidighanliqini bildürgen idi.

Birleshme agéntliqining xewer qilishiche, xitay döletlik néfit shirkiti charshenbe küni jenubiy koriye we ereb birleshme xelipilikining shirkiti bilen bir guruppa teshkillep, türkmenistanning tebi'iy gaz néfitlikini qézish qurulushigha 9 milyard 700 milyon dollar meblegh sélish toxtamnamisigha érishken. Bu xitay tereqqiyat bankisining qazaqistan mis shirkiti kélishim imzalap, 2 milyard 700 milyon dollar qerz bérishke pütüshken waqit bilen oxshash mezgilge toghra kelgen idi.

Xewerde bu pulning 2 milyard 100 milyon dolliri qazaqmis shirkitining bozchiqul mis kan qurulushi we bozimchaq mis - altun qurulushigha serp qilinidighanliqini bildürgen. Qazaqmis shirkitining bash ijra'iye emeldari olég nowachuk "bu meblegh qazaqistanning köplep mis ishlep chiqirip, xitaydiki xéridarlirining éhtiyajini qamdashni kapaletke ige qilidighanliqi"ni tekitligen. Lékin xitay meblighi qazaqistandiki öktichilerni endishige séliwatqan bolup, yéqinda xitay qazaqistandin yer ijare élip yéza igilik bilen shughullunishni telep qilghan. Qazaqistan hökümiti bu telepni ret qilghan idi.

Toluq bet