Dunya Uyghur qurultiyi xitay tashqi ishlar mu'awin ministirining sözlirini qattiq eyiblidi

Xitay xewerler torining bügünki xewiridin melum bolushiche, xitay tashqi ishlar mu'awin ministiri shü kéchang düshenbe küni xewpsizlik kéngishide chaqirilghan térrorluqqa qarshi turush munazire yighinida söz qilip, xitay dölitining térrorchiliqning qurbani ikenlikini, “Sherqiy türkistan islam herikiti” qatarliq sherqiy türkistan térrorchi küchlirining xitaydiki térror heriketlirining puqralarning hayati we méligha nurghun ziyanlarni salghanliqini ilgiri sürgen.

U yighinda yene, xitay hökümitining herqaysi eller bilen térrorluqqa qarshi hemkarliqni kücheytishige alaqidar 4 maddini otturigha qoyup ötüp, térrorgha qarshi küreshni téximu kücheytishni telep qilghan.

Dunya Uyghur qurultiyi xitay emeldari shü kéchangning yuqiridiki sözlirini qet'iy ret qildi we uni qattiq eyiblidi. Ular xitay hökümitining 11-séntebir weqesidin kéyin xelq'arada qozghalghan térrorluqqa qarshi turush dolqunidin paydilinip turup, Uyghurlar üstidin dölet térrorchiliqi yürgüzüsh arqiliq, xitaydin til, medeniyet we din jehettin tamamen perqlinidighan bir milletni basturuwatqanliqini bildürdi.

Dunya Uyghur qurultiyi bayanatida eskertip, emeliyette kimning térrorluq bilen shughulliniwatqanliqi kishilik hoquqni yaqilaydighan xelq'ara jama'etke besh qoldek ayan, dédi.