Хитай һөкүмити чәтәлләргә "шинҗаңни" тәшвиқ қилишни күчәйтмәктә

Хәлқара миқяда уйғур ели һәққидики учурларниң көпийиши, хәлқара җәмийәтниң уйғурларниң сиясий, иҗтимаий - иқтисадий әһвали вә башқа мәсилилири һәққидики чүшәнчилириниң көпийишигә әгишип, хитай һөкүмитиму чәтәлләрдики ахбарат васитилири билән һәмкарлишип, "җуңго һөкүмитиниң шинҗаңни гүлләндүрүшкә қошқан төһписи вә шинҗаңниң қандақ тәрәққи қиливатқанлиқи һәмдә уйғур қатарлиқ аз санлиқ милләтләрниң қандақ бәхтияр яшаватқанлиқини" тәшвиқ қилишқа әһмийәт бәрмәктә.
Мухбиримиз үмидвар
2008.09.28

27 - Сентәбир күни уйғур аптоном районлуқ парткомниң тәшәббуси вә орунлаштуруши билән үрүмчидә америка, франсийә, әнгилийә, германийә қатарлиқ бир қисим әлләрдики бир қанчә хитай тили вә башқа тилларда чиқидиған гезитләрниң тәһрирлири йиғилип, аптоном районлуқ партком тәшвиқат бөлүми билән қандақ қилғанда, буниңдин кейин шинҗаңни яхши тәшвиқ қилиш мәсилилирини музакирә қилған шуниңдәк явропада чиқидиған " явропа вақти гезити"' америкидики "муһаҗирлар" гезитиниң мәхсус "шинҗаңға нәзәр" сәһиписини ечип, җәмий 1000 сан чиқарғанлиқини тәбриклигән.
 
Шинхуа агентлиқиниң бу һәқтики учурлиридин мәлум болушичә, бу паалийәткә партком тәшвиқат бөлүми башлиқи личи қатнашқан. У, чәтәллик гезитчилардин "чәт әлләрдә шинҗаңни чүшинишни техиму кеңәйтиш, шинҗаңниң тарихи вә һазирқи әһвалини билдүрүш һәмдә шу арқилиқ обйектип, реал шинҗаңниң образини тикләш керәкликини "тәкитлигән.

Буниңдин илгири аптоном район рәиси нур бәкри кадирлар йиғинида сөзлигәндә, рабийә қадир башлиқ дуня уйғур қурултийиниң чәтәлләрдә елип бериватқан паалийәтлирини көрситип, аталмиш "миллий бөлгүнчиләрниң уйғурларниң әһвалини бурмилиғанлиқи" ни әйиблигән һәмдә буниңдин кейин тәшвиқатни күчәйтишни тәләп қилған иди.

Нөвәттә, чәтәлләрдики атақлиқ ахбарат васитилири б б с, америка авази, ройтерс, бирләшмә агентлиқи, с н н, әркин асия радиоси қатарлиқлар даим дегүдәк уйғурларниң һазирқи еғир вәзийити, түрлүк мәсилилири һәққидә мәлумат берип туруш билән хәлқарада уйғурлар һәққидики учурлар көпәймәктә.

Инкаслардин қариғанда, хитай әркин асия радиоси һәмдә чәтәлләрдики мустәқил мәтбуатларниң хәвәрлирини қамал қилишниму күчәйтмәктә.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.