Xitay hökümiti chet'ellerge "shinjangni" teshwiq qilishni kücheytmekte

Xelq'ara miqyada Uyghur éli heqqidiki uchurlarning köpiyishi, xelq'ara jemiyetning Uyghurlarning siyasiy, ijtima'iy - iqtisadiy ehwali we bashqa mesililiri heqqidiki chüshenchilirining köpiyishige egiship, xitay hökümitimu chet'ellerdiki axbarat wasitiliri bilen hemkarliship, "junggo hökümitining shinjangni güllendürüshke qoshqan töhpisi we shinjangning qandaq tereqqi qiliwatqanliqi hemde Uyghur qatarliq az sanliq milletlerning qandaq bextiyar yashawatqanliqini" teshwiq qilishqa ehmiyet bermekte.
Muxbirimiz ümidwar
2008-09-28
Share

27 - Séntebir küni Uyghur aptonom rayonluq partkomning teshebbusi we orunlashturushi bilen ürümchide amérika, fransiye, en'giliye, gérmaniye qatarliq bir qisim ellerdiki bir qanche xitay tili we bashqa tillarda chiqidighan gézitlerning tehrirliri yighilip, aptonom rayonluq partkom teshwiqat bölümi bilen qandaq qilghanda, buningdin kéyin shinjangni yaxshi teshwiq qilish mesililirini muzakire qilghan shuningdek yawropada chiqidighan " yawropa waqti géziti"' amérikidiki "muhajirlar" gézitining mexsus "shinjanggha nezer" sehipisini échip, jem'iy 1000 san chiqarghanliqini tebrikligen.
 
Shinxu'a agéntliqining bu heqtiki uchurliridin melum bolushiche, bu pa'aliyetke partkom teshwiqat bölümi bashliqi lichi qatnashqan. U, chet'ellik gézitchilardin "chet ellerde shinjangni chüshinishni téximu kéngeytish, shinjangning tarixi we hazirqi ehwalini bildürüsh hemde shu arqiliq obyéktip, ré'al shinjangning obrazini tiklesh kéreklikini "tekitligen.

Buningdin ilgiri aptonom rayon re'isi nur bekri kadirlar yighinida sözligende, rabiye qadir bashliq dunya Uyghur qurultiyining chet'ellerde élip bériwatqan pa'aliyetlirini körsitip, atalmish "milliy bölgünchilerning Uyghurlarning ehwalini burmilighanliqi" ni eyibligen hemde buningdin kéyin teshwiqatni kücheytishni telep qilghan idi.

Nöwette, chet'ellerdiki ataqliq axbarat wasitiliri b b s, amérika awazi, roytérs, birleshme agéntliqi, s n n, erkin asiya radi'osi qatarliqlar da'im dégüdek Uyghurlarning hazirqi éghir weziyiti, türlük mesililiri heqqide melumat bérip turush bilen xelq'arada Uyghurlar heqqidiki uchurlar köpeymekte.

Inkaslardin qarighanda, xitay erkin asiya radi'osi hemde chet'ellerdiki musteqil metbu'atlarning xewerlirini qamal qilishnimu kücheytmekte.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet