Amérika, xitaydin import qilin'ghan köymes tam ishlitilgen öyler témining pütünley qaytidin yasilishi kéreklikini körsetti

Melum bolushiche, florida, wirginiye, missisipi, alabama we lu'isi'ana qatarliq shtatlardin 3 minggha yéqin öy igisi xitayda ishlen'gen köymes tamni ishlitip chataq chiqqanliqini doklat qilghan.

Netijide amérika istémalchilar bixeterlik komitéti tekshürüsh élip bérip, bu xildiki tamlarning pütünley chéqilip qayta sélinishi kéreklikini ilgiri sürdi.

Jüme küni komitét re'isi inéz tenenba'um: "biz öy igilirining bu xildiki tamlarni pütünley qomuruwétip, oyning ichki qismini qayta yasishini we hayatini qaytidin bashlishini telep qilimiz" dédi.

Xewerde körsitishiche, xitayda ishlen'gen bu xildiki tamlar tok yolliri, hawa almashturush sistémisi, kompyutér, ishik tutquchliri we zinnet buyumliriningmu chirip kétishini keltürüp chiqarghan. Bu xildiki tamlarning hetta ademlerning salametlikigimu éghir ziyan yetküzüshi mumkin iken.

Inéz tenenba'um xanimning bildürüshiche, xitaydin import qilin'ghan quruq tamlar chiqiridighan gidro sulfid ximiyilik maddisining miqdari bashqa yerde ishlen'gen quruq tamlargha qarighanda 100 hesse yuqiri iken.

Melum bolushiche, bu xil tamlar yéqinqi yillarda amérika oy bazirida körün'gen örlesh hadisisi jeryanda bir qeder köp import qilin'ghan bolup, bu xildiki tamlar yéngi sélin'ghan öylerde bir qeder köp uchraydiken.

Amérika kéngesh palata ezasi bil nélson nöwette oy igiliri tartqan ziyanni kimdin tölitiwélish mesilisining muhim mesile ikenlikini ilgiri sürgen. U mundaq dégen: " buni öy igiliri keltürüp chiqarghini yoq. Belki xitaydiki zawut igiliri keltürüp chiqardi. Shunga biz bu mesilini hel qilishta xitayning mes'uliyitini sürüshte qilishimiz kérek."

2007 Yili xitay ishligen balilar oyunchuqliri we ermek haywan yémekliride zeherlik madda mélamin bayqilip, amérika istimalchilirida jiddiylik peyda qilghan idi.