Ху җинтав билән дмитри медведеф учрашти

Русийиниң вәтән урушиниң 65 йиллиқини хатириләш паалийитигә қатнишиш үчүн кәлгән хитай дөләт рәиси ху җинтав йәкшәнбә күни русийә президенти дмитри медведефниң қобул қилишиға еришип, икки дөләтниң истратегийилик һәмкарлиқ мунасивәтлири һәққидә пикир алмаштурди.
Мухбиримиз үмүдвар
2010.05.09

Русийиниң интерфакис агентлиқлириниң хәвәр қилишичә, ху җинтав дмитри медведеф билән учришиш җәрянида пүтүн русийә хәлқини ғалибийәт байрими билән тәбриклигән һәмдә "бу бизниң ортақ байримимиз" дегән. У йәнә, хитайниң иккинчи җаһан уруши тарихи мәсилисидә русийә билән охшаш мәйданда икәнликини тәкитлигән.

Шинхуаниң хәвиридә ейтилишичә, медведеф ху җинтавниң вәтән урушиниң 65 йиллиқини хатириләш мурасимиға кәлгәнликини қизғин қарши алидиғанлиқини билдүргән.

Ху җинтав сөзидә русийә билән хитайниң хәлқара мәсилиләрдә техиму маслишиватқанлиқи вә русийә - хитай мунасивәтлириниң йеңи бир басқучқа киргәнликини тәкитлигәндин сирт йәнә икки дөләтниң истратегийилик һәмкарлиқини күчәйтиш һәққидә төт хил тәклип бәргән. Буларниң ичидә "террорчилиққа қарши саһәдики һәмкарлиқни күчәйтип, 'үч хил күчләр'гә ортақ зәрбә бериш" дегәндәк тәшәббусму бар.

Б б с агентлиқиниң хәвәр қилишичә, буниңдин илгири ху җинтав русийә баш министири путин билән көрүшкәндиму "үч хил күчләр"гә ортақ зәрбә бериш мәсилисини тилған алған.

Хитай билән русийиниң "үч хил күчләр"гә ортақ қарши туруш нами астидики уйғурларниң сиясий һәрикәтлиригә бирлишип зәрбә бериш, сабиқ президент борис йелтсин дәвридә пүтүшүлгән болуп, владимир путин бу һәмкарлиқни техиму күчәйткән иди.

Хитай, русийиниң чечән пидаийлирини йоқитиш вә земин пүтүнлүкини қоғдаш һәрикитини, русийә болса, хитайниң уйғур мустәқилчилиригә зәрбә бериш күришини өзара қоллаш һәққидә келишим һасил қилған.
 
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.