Xu jintaw bilen dmitri médwédéf uchrashti

Rusiyining intérfakis agéntliqlirining xewer qilishiche, xu jintaw dmitri médwédéf bilen uchrishish jeryanida pütün rusiye xelqini ghalibiyet bayrimi bilen tebrikligen hemde "bu bizning ortaq bayrimimiz" dégen. U yene, xitayning ikkinchi jahan urushi tarixi mesiliside rusiye bilen oxshash meydanda ikenlikini tekitligen.

Shinxu'aning xewiride éytilishiche, médwédéf xu jintawning weten urushining 65 yilliqini xatirilesh murasimigha kelgenlikini qizghin qarshi alidighanliqini bildürgen.

Xu jintaw sözide rusiye bilen xitayning xelq'ara mesililerde téximu maslishiwatqanliqi we rusiye - xitay munasiwetlirining yéngi bir basquchqa kirgenlikini tekitligendin sirt yene ikki döletning istratégiyilik hemkarliqini kücheytish heqqide töt xil teklip bergen. Bularning ichide "térrorchiliqqa qarshi sahediki hemkarliqni kücheytip, 'üch xil küchler'ge ortaq zerbe bérish" dégendek teshebbusmu bar.

B b s agéntliqining xewer qilishiche, buningdin ilgiri xu jintaw rusiye bash ministiri putin bilen körüshkendimu "üch xil küchler"ge ortaq zerbe bérish mesilisini tilghan alghan.

Xitay bilen rusiyining "üch xil küchler"ge ortaq qarshi turush nami astidiki Uyghurlarning siyasiy heriketlirige birliship zerbe bérish, sabiq prézidént boris yéltsin dewride pütüshülgen bolup, wladimir putin bu hemkarliqni téximu kücheytken idi.

Xitay, rusiyining chéchen pida'iylirini yoqitish we zémin pütünlükini qoghdash herikitini, rusiye bolsa, xitayning Uyghur musteqilchilirige zerbe bérish kürishini özara qollash heqqide kélishim hasil qilghan.