Хитайдики әң чоң ядро әхләтлирини бир тәрәп қилиш завути гоби чөлигә ясалмақчи

Мунасивәтлик хадимлар хитайдики әң чоң ядро әхләтлирини бир тәрәп қилиш завутиниң ғәрби шимал районидики гоби чөлигә ясайдиғанлиқини ашкарилиди.
Мухбиримиз җүмә
2010.11.27

"Җәнуби хитай сәһәр гезити"дә хәвәр қилинишичә, бу һәқтики учурларни хитай муһит қоғдаш министирликидики ядро әхләтлирини бир тәрәп қилиш вә тошуш бөлүмниң директори шяв миңчаң ашкарилиған.

Хәвәргә қариғанда, мәзкур завутни қуруш пилани, хитай президенти ху җинтавниң франсийә зиярити җәрянида хитай билән франсийә ядро әхләтлирини бир тәрәп қилиш ширкити оттурисида имзаланған келишимидин кейин оттуриға чиққан.

Мәлум болушичә, хитайда ясилидиған, мәзкур ядро қалдуқлирини бир тәрәп қилиш завути хитай бойичә әң чоң завут һесаблинидикән.

Бу завутта хитайдин чиқидиған ядро әхләтлири бир тәрәп қилинипла қалмай, хитай чәтәлләрдики чоң ядро реакторлиридин импорт қилған әхләтләрму бир тәрәп қилинидикән.

Хәвәрдә көрситишичә, бу хилдики завутлар интайин зор миқдарда су ишлитидиған болғачқа, дуняниң һәммә йеридә деңиз бойиға йеқин җайларға ясилидикән. Һалбуки хитайда завутниң сусиз чөлгә ясилиши толиму ғәлитилик һесаблинидикән.

Бу хилдики завутларниң муһит вә саламәтликкә көрситидиған әкс тәсири интайин еғир болғачқа, башқа җайларда ясаш рухсәтнамиси елиш интайин қийинға тохтайдикән.

Хәвәр қилинишичә, һәтта хитайниң деңиз бойидики шәһәрлири мәзкур завутниң өз райониға қурулушиға қарши турған.

Илгири бир қисим мутәхәссисләр, хитайниң ядро әхләтлирини уйғур елидики тәклимакан қумлуқиға көмүп бир тәрәп қиливатқанлиқини илгири сүрүшкән иди. Һалбуки, шяв миңчаң завутниң конкретни зади қәйәргә ясилидиғанлиқини билдүрмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.