Японийә билән хитай бирләшмә һәрбий маневир өткүзүшкә қошулди

Японийә билән хитай җүмә күни икки дөләт тарихидики тунҗи бирләшмә һәрбий маневир өткүзүшкә пүтүшкәнликини елан қилди. Көзәткүчиләр, бу һадисә икки дөләт арисидики узундин бери мәвҗүт болған түрлүк ихтилапларниң юмшашқа башлиғанлиқиниң сигнали дәп қарашмақта.
Мухбиримиз әркин
2009-11-27
Share

Лекин японийә баш министири юкио хайотама вә японийә мудапиә министири тошими китазава японийидә зиярәттики хитай дөләт мудапиә министири ляң гуаңлейдин хитай һәрбий селинмиси вә һәрбий тәрәққият мәқситиниң очуқ - ашкара болушини тәләп қилған. Ройтерс агентлиқиниң хәвәр қилишичә, ляң гуаңлей билән китазава хитай - японийә һәрбий қисимлириниң деңизда издәш вә қутқузуш бирләшмә маневири елип беришиға қошулғанлиқини билдүргән.

Бу һәқтики хәвәрләргә қариғанда, японийә дөләт мудапиә министири китазава, "мән икки дөләтниң деңизда маневир елип беришқа қошулғанлиқини икки тәрәпниң өз ‏- ара бир ‏- бирини чүшиниш вә бир - биригә ишиниш җәһәттә зор илгириләш һасил қилғанлиқиниң рошән ипадиси дәп қараймән" дегән. Ляң гуаңлей болса, тәрәпләрниң ойлиғанлирини тартинмай ашкара оттуриға қойғанлиқини, нурғун мәсилиләрдә пикир бирлики барлиқиға қошулғанлиқини тәкитлигән.

Лекин китазава кейинрәк мухбирларниң зияритини қобул қилип, өзиниң ляң гуаңлейға хитай һәрбий тәрәққиятиниң японийигә охшаш ашкара болушини, җүмлидин мудапиә ақ ташлиқ китабида һәрбий селинма вә қорал - ярақларға аит тәпсилий диталларни елан қилишни тәләп қилғанлиқини билдүргән.

Японийә мудапиә министирлиқидики әмәлдарларниң әскәртишичә, китазава ляң гуаңлейға йәнә, әгәр хитай һәрбий селинма вә қорал ярақлирини ашкара тутмиса, бу башқиларда гуман қозғайдиғанлиқини тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт