Японийә - хитай тарихчилири бәзи тарихий мәсилиләрдики пикир ихтилапини түгитәлмиди

Японийә - хитай бирләшмә тарих гурупписи 1937 ‏- йилдики нәнҗиң вәқәсини өз ичигә алған йеқинқи заман тарихиға аит бәзи тарихий һадисиләрдә тарихни қандақ шәрһиләш җәһәттики ихтилаплар сәвәби пикир бирлики һасил қилалмиди.

Мухбиримиз әркин
2009-12-25

Бирләшмә тарих гурупписи 10 нәпәр японийилик тарихчи вә 10 нәпәр хитай тарихичини асас қилип қурулған болуп, улар 3 йил ичидә оттура әсирдин һазирқи заманғичә болған японийә - хитай мунасивәт тарихини йезип чиқиш вәзиписини үстигә алған иди.

Лекин тарих гурупписидики японийилик тарихчилар билән хитай тарихчилар "нәнҗиң вәқәси"гә қандақ баһа бериш мәсилисидә пикир бирликигә келәлмигән.

Тарих гурупписи пәйшәнбә күни ахбарат елан қилиш йиғини чақирған болуп, йиғинда тәрәпләр нәнҗиң вәқәсигә баһа бериш мәсилисидики ихтилапини оттуриға қойди. Хитай тәрәп японийә армийисиниң 1937 ‏- йили нәнҗиң вәқәсидә 300 миң пуқрани қирғин қилғанлиқини илгири сүрмәктә иди. Йиғинда хитай тәрәпниң мәсули, хитай иҗтимаи пәнләр акадимийиси һазирқи заман тарих иниститутиниң профессори бу пиң " нәнҗиң қирғинчилиқидики әң муһим елемент сан амили болуп, бу униңдики ачқучтур" дегән. Бу пиң, бу санниң 1945 - йили японийә тәслим болғандин кейин ечилған нәнҗиң вә иттипақдаш әлләр сот коллигийисидә қобул қилинғанлиқини билдүргән.

Лекин японийә тәрәпниң мәсули, токйо университетиниң профессори шиничи китавка, бу пиңниң қаришиға қошулмайдиғанлиқини әскәртип, иттипақдаш әлләр қурған японийини җазалаш мәқситидики "нәнҗиң вә токйо сот коллигийиси қобул қилған бу санниң келиш мәнбәәсидә мәсилә барлиқиға ишинимиз" дәп тәкитлигән.