Yawro-asiya yermenkisi bashlinish aldida ürümchi téximu qattiq qamal astigha élindi

Bügün xitay awi'atsiye xewerler torining xewiridin qarighanda, yermenke mezgilide herqaysi ölkilerdin ürümchige qarap uchidighan ayropilanlar we ürümchi ayrodromidiki tekshürüshler kücheytilgen bolup, jama'et xewpsizlik tarmaqliri, ayrodrom alahide saqchiliri we qoralliq saqchi qisimliri öz-ara hemkarliship ayrodrom bixeterlikini qoghdaydiken.

Buningdin sirt, bu yilliq yermenke bashlinishtin ilgiri 30 künlük yermenkini kütüwélish pa'aliyiti qanat yaydurulup, ürümchidiki idare-organlarning xadimliri oxshashla kocha-koylarni nazaret qilishqa we sheher muhitini saqlashqa chiqirilghan. Uyghur élide turushluq bingtu'en xewpsizlik qisimlirimu öz aldigha heriketke ötüp, sheherdiki herqaysi kirish-chiqish éghizlirida qoralliq halda post turushqa bashlighan bolup, herqaysi éghizlarda kirip chiqqanlarning kimlikliri we somkiliri tekshürülmekte iken.

2-Nöwetlik yawro-asiya yermenkisining kölimi aldinqi nöwetlik yermenkidin köp chong bolup, Uyghur aptonom rayon da'iriliri yermenkining bixeterlikige kapaletlik qilish üchün mexsus 19 milyon yüen meblegh chiqirip, herbiy aptomobil, alaqilishish apparati we adem tekshürüsh apparatigha oxshash türlük bixeterlik üskünilirini toluqlighan.

Uyghur élidin kelgen xewerlerdin yene, hazir saqchi da'irilirining ürümchidiki bir qisim közitiliwatqan kishilerni bashqa yaqlargha kétishke mejburlawatqanliqi, yaqa yurtlardin kelgenlerni yurtlirigha qoghlighanliqi melum bolmaqta.