Үрүмчи явру-асия йәрмәнкиси қаттиқ бихәтәрлик тәдбирлири астида башланди

Пәйшәнбә күни явру-асия сода йәрмәнкиси қаттиқ бихәтәрлик тәдбирлири астида үрүмчидә рәсмий башланди.
Мухбиримиз ирадә
2011.09.01

Бүгүн ройтерс вә әлҗәзирә қатарлиқ хәвәр агентлиқлириниң мухбирлириниң үрүмчидин бәргән хәвәрлиридин қариғанда, шу күни йәрмәнкиниң кириш еғизида зиярәтчиләр узундин-узунға созулған бихәтәрлик тәкшүрүшидин өткүзүлгән.

Һөкүмәт органлири бир күнлүк дәм елишқа қоюветилгән болсиму, йәрмәнкә райони әтрапидики йолларда еғир қатнаш қистаңчилиқи келип чиққан.

Бошун тор бетиниң хәвәр қилишичә, йәрмәнкә мәзгилидә үрүмчидики шәһәр вә район дәриҗиликтин төвән органларниң хадимлири вә шундақла оқутқучи, кадир, сестралар һәммиси “муқимлиқ сақлаш” қа чиққан.

Уларниң һәммисигә йешил рәңлик сақчи формиси вә йешил рәңлик яғач калтәк тарқитип берилип, мәһәллиму-мәһәллә, кочиму-коча чарлашқа қоюлған. Һөкүмәт органлири пәйшәнбә күни дәм елишқа қоюп берилип, кишиләргә амал бар өйидин талаға чиқмаслиқи уқтуруш қилинған.

Үрүмчидә ечилған тунҗи нөвәтлик явру-асия йәрмәнкисини хитай даирилири хәлқарада алаһидә кәң тәшвиқ қилип, йәрмәнкиниң уйғур елини оттура вә шәрқий асияниң тиҗарәт мәркизи һалиға елип келиш үчүн һүл салидиғанлиқини илгири сүрди. Әмма, хәлқара җамаәтниң диққитини йәрмәнкиниң хитай һөкүмити тәшвиқ қилған тәрәплири әмәс, бәлки униңда елинған мислисиз бихәтәрлик тәдбирлири өзигә тартмақта.

Бүгүн чәтәл мухбирлири тарқатқан учурларда йәрмәнкиниң биринчи күни зиярәтчиләрниң саниниң пәрәз қилинғандин көп аз болғанлиқи вә йәрмәнкигә қатнашқан карханиларниң ичидә уйғур елиниң йәрлик хәлқи болған уйғурларға аит карханиларниң бармақ билән санивалғудәк дәриҗидә азлиқи алаһидә гәвдиләндүрүлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.