Ürümchi yawru-asiya yermenkisi qattiq bixeterlik tedbirliri astida bashlandi

Peyshenbe küni yawru-asiya soda yermenkisi qattiq bixeterlik tedbirliri astida ürümchide resmiy bashlandi.
Muxbirimiz irade
2011.09.01

Bügün roytérs we eljezire qatarliq xewer agéntliqlirining muxbirlirining ürümchidin bergen xewerliridin qarighanda, shu küni yermenkining kirish éghizida ziyaretchiler uzundin-uzun'gha sozulghan bixeterlik tekshürüshidin ötküzülgen.

Hökümet organliri bir künlük dem élishqa qoyuwétilgen bolsimu, yermenke rayoni etrapidiki yollarda éghir qatnash qistangchiliqi kélip chiqqan.

Boshun tor bétining xewer qilishiche, yermenke mezgilide ürümchidiki sheher we rayon derijiliktin töwen organlarning xadimliri we shundaqla oqutquchi, kadir, séstralar hemmisi “Muqimliq saqlash” qa chiqqan.

Ularning hemmisige yéshil renglik saqchi formisi we yéshil renglik yaghach kaltek tarqitip bérilip, mehellimu-mehelle, kochimu-kocha charlashqa qoyulghan. Hökümet organliri peyshenbe küni dem élishqa qoyup bérilip, kishilerge amal bar öyidin talagha chiqmasliqi uqturush qilin'ghan.

Ürümchide échilghan tunji nöwetlik yawru-asiya yermenkisini xitay da'iriliri xelq'arada alahide keng teshwiq qilip, yermenkining Uyghur élini ottura we sherqiy asiyaning tijaret merkizi haligha élip kélish üchün hül salidighanliqini ilgiri sürdi. Emma, xelq'ara jama'etning diqqitini yermenkining xitay hökümiti teshwiq qilghan terepliri emes, belki uningda élin'ghan mislisiz bixeterlik tedbirliri özige tartmaqta.

Bügün chet'el muxbirliri tarqatqan uchurlarda yermenkining birinchi küni ziyaretchilerning sanining perez qilin'ghandin köp az bolghanliqi we yermenkige qatnashqan karxanilarning ichide Uyghur élining yerlik xelqi bolghan Uyghurlargha a'it karxanilarning barmaq bilen saniwalghudek derijide azliqi alahide gewdilendürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.