Явропа рәһбәрлири бейҗиң йиғинида кишилик һоқуқниң муһимлиқини әскәртти

Явропа рәһбәрлири вә явропа иттипақиниң бу нөвәтлик рәис дөлити франсийә президенти саркозий җүмә күни бейҗиңда башланған асия - явропа башлиқлар йиғинида сөз қилип, кишилик һоқуқниң бәзи дөләтләргә хас, йәнә бәзи дөләтләр хали нәрсә әмәслики, униң пүтүн инсанийәткә ортақ нәрсә икәнликини әскәртти.
Мухбиримиз әркин
2008-10-24
Share

Асия вә вә явропадики 43 дөләтниң рәһбәрлиригә " биз һечқандақ бир дөләт башқа бир дөләткә тәлим бәрмәслики керәкликигә ишинимиз " дәп тәкитлигән франсийә президент саркозий, "лекин биз йәнә инсанниң қәдир қиммити бир дөләтниң тарихий вә мәдәнийити билән бағлиқ әмәсликигә ишинимиз. Бу йәр шаридики һәр бир инсанға хас болған һоқуқтур" дәйду.

Бейҗиңда чақирилған бу қетимқи йиғинниң вақти явропа парламенти хитай һөкүмитиниң агаһландурушиға қаримай, хитай кишилик һоқуқ паалийәтчиси ху җяға сахаров мукапати бәргәнликини елан қилған күнниң әтисигә тоғра кәлгән иди. Йиғинда явропа комитетиниң президенти бароссо йиғиндики һәр қайси дөләт башлиқлириға кишилик һоқуқниң омумийлиқини тәкитлигән вә кишилик һоқуқни һимайә қилишни тәләп қилған. Бароссо мундақ дәйду": кишилик һоқуқ омумийлиққа игә тәбий бир һоқуқтур. Бизниң униңға һөрмәт көрситиш мәсулийитимиз бар .... Биз кишилик һоқуқни йәр шари миқясида илгири сүрүш вә қоғдаш һәмкарлиқини күчәйтишимиз керәк."

Бейҗиң башлиқлар йиғини башланған шу күни франсийә кишилик һоқуқ министири рама яде хитай даирилирини ху җяни қоюп беришкә чақирди. У,хитай "җинайәтчи", дәп әйиблигән ху җяни ақлап, " бизниң нәзиримиздә у кишилик һоқуқ паалийәтчиси шундақла у бүгүн қоюп берилиши керәк " дәп әскәртти. " Хитайниң башқа дөләтләргә охшаш мәсулийити вә мәҗбурийити бар " дәп тәкитлигән рама яде " хитайниң өз мәсулийитини ада қилиши наһайити муһим " дәйду.

Бейҗиңда ечиливатқан асия - явропа башлиқлар йиғининиң асаси музакирә мәзмуни пул - муамилә базиридики кризис, ениргийә бихәтәрлики вә һава килиматиға мунасивәтлик мәсилиләр болсиму, лекин явропа комитетиниң президенти бароссо кишилик һоқуқниң оттуриға қоюлидиғанлиқини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт