Uyghur élining partkom sékrétari jang chünshyen '3 xil küchler' ge qattiq zer bérishni tekitligen

Jang chünshyen, 6 - may Uyghur aptonom rayonluq siyasiy kéngeshke bérip, yéqinda xitay merkiziy hökümiti achidighan " shinjang xizmiti yighinini" ni kütüwélish we yighin rohini emeliyleshtürüsh toghrisida orunlashturush élip barghan.

U siyasiy kéngeshte yene, xelqning turmush sewiyisini östürüsh we milletler ittipaqliqini ilgiri sürüsh toghrisida toxtalghan.

Jang chünshyen 6 - may yene, Uyghur élide turushluq xitay herbiy qisimlirini közdin kechürgen. U, Uyghur élidiki herbiy qisimlarning merkez we Uyghur aptonom rayonining muhim orunlashturushlirigha boysunup kelgenlikini tilgha alghan. U yene, herbiy qisimlarning "5 - iyul weqesi" ni tinchitishta "siyasiy meydani mustehkem, tüzümge boysunushta qattiq, herikiti keskin" bolghanliqigha alahide yuqiri baha bergen.

Jang chünshyen: "shinjangning zémini keng, bayliqi mol. U wetinimizning gherbidiki bir göher zémin. Shinjang dölitimizning eng muhim énérgiye bazisi, gherbke qarap tereqqiy qilishtiki köwrük istihkami, shundaqla dölitimizning gherbiy shimalidiki istratégiyilik tosuq we istratégiyilik muhim jay" dégen.

U Uyghur élidiki herbiy qisimlardin "muqimliq hemmidin ela" dégen rohni turghuzup, "shinjangning muqimliq xizmitini merkez qilghan asasta "3 xil küchlerge" izchil yuqiri bésim bilen qarshi turushni boshatmasliq" ni telep qilghan.

Jang chünshyen 24 - aprél Uyghur élige teyinlen'gen. Uning xelqchil we démokratik idiyige ige rehber ikenlikini ilgiri sürülgen idi. Halbuki, jangning yuqirida qilghan sözliri wang léchüen dewridikidin alahide perqlenmeydighandek qilatti.