Filippin xitayning yéngi pasportigha wiza qoyulmaydighanliqini jakarlidi

Seyshenbe küni wyétnam xitayning yéngi pasportigha wiza bermeydighanliqini jakarlighan idi. Bügün filippinmu bu sepke qétildi.
Muxbirimiz gülchéhre
2012-11-28
Élxet
Pikir
Share
Print

Xitayning yéngi pasportida jenubiy déngizdiki igilik hoquq talash ‏-tartishida turuwatqan jaylarningmu xitay térritoriyisi qilip körsitilgenliki, hindistan, teywen, wyétnam we filippin qatarliq dölet we rayonlarning naraziliqini qozghighan idi.

Yéngi xitay pasportida jenubiy déngizigha filippinning gherbiy déngizimu kirgüzülgen bolup, filippin bügün xitayning bu qilmishigha naraziliq bildürüp resmiy heriket qollinidighanliqini yeni xitayning yéngi pasporti bilen wiza iltimas qilghanlargha wiza bérilmeydighanliqini élan qilghan.

Birleshme agéntliqining 28-noyabir bu heqtiki xewirige qarighanda, filippin diplomatiye ministirliqi charshenbe küni bu heqtiki bayanatida "Bu pasportqa wiza tamghisi bésish,xitayning öktemlikini qanunlashturup qoyghanliq bolidu" dep körsetken.

Xitayning yéngi chiqarghan pasportidiki jenubiy déngizdiki igilik hoquqi talash ‏-tartishta turghan jaylarnimu özining térritoriyisi qilip körsitilgen xitay xeritisi wyétnam, filippin, teywen hemde hindistanning birdek ret qilishigha uchridi. Filippin we wyétnam wiza bermeslik arqiliq resmiy heriket qollandi, teywende naraziliq namayishi élip bérildi.

Xitay tashqi ishlar ministirliqi bu xeritining xitayning yéngi pasportigha kirgüzülüshi bu dölet we rayonlarning héchqaysisigha qaritilghan emes, dégendin bashqa chüshendürüsh bermidi.

Amérika rayondiki déngiz qatnishining bixeterlikini kapaletlendürüsh üchün mezkur mesilini xitayning aldigha qoyidighanliqini bildürdi.

Toluq bet