Даириләр қәшқәрниң йәкән наһийисидә роҗистива вә йеңи йил мунасивити билән йиғилиш өткүзгән уйғур вә хитай христианлириниң диний мурасимиға мудахилә қилди

Уйғур елидә христиан миссионерлиқ паалийити елип баридиған америкидики христиан диний гуруһи " җуңго ярдәм җәмийити" ниң ашкарилишичә, йәрлик даириләр өткән йәкшәнбә күни йәкән наһийисидә бир йәргә топлинип, диний мурасим өткүзмәкчи болған уйғур, хитай христиан муритлиридин 31 кишиниң мурасим өткүзүшигә йол қоймиған вә уларниң "қанунсиз диний йиғилиш" елип барғанлиқини баһанә қилип, уларни тарқитивәткән.

Лекин бу вәқә йеқинқи бир һәптидин бери уйғур елидә йүз бәргән христиан муритлириниң диний паалийитиниң йәрлик даириләр тәрипидин мудахилигә учриғанлиқиға даир бирдин - бир вәқәси әмәс. Буниңдин сәл бурун 21 - декабир күни уйғур илиниң читәй наһийисидә бир йәр асти христиан черкавиниң 3 нәпәр мурити тутқунға учрап, " қанунсиз диний йиғилиш"қа қатнишиш билән әйибләнгән. Даириләр уларни 5 күн қамап қоюп, 27 ‏- чесла қоюп бәргән иди.

"Җуңго ярдәм җәмийити" ниң мәлуматидин қариғанда йәкәндики диний мурасимиға қатнашқан уйғур вә христиан муритлириниң ичидә даириләр тәрипидин тутуп қелинғанлар йоқ.

Уйғур илиниң вәзийитидин хәвәрдар бәзи анализчиларниң илгири сүрүшичә вә америка дөләт ишлар министирлиқиниң кишилик һоқуқ доклатлиридин мәлум болушичә, хитай һөкүмити уйғурлар билән туңганларға охшимиған диний сиясәт йүргүзүпла қалмай, христианлар билән мусулманларға охшимиған сиясәт йүргүзмәктә. "Қанунсиз" дәп қаралған христиан диний паалийәтлиригә сүкүт қилмисиму, лекин уйғур мусулманлириниң аталмиш "қанунсиз диний паалийәтлирини " үзүл-кесил бастурмақта вә мусулман диний затларни узун муддәтлик қамақ җазасиға һөкүм қилмақта.