Uyghur aptonom rayonluq yuqiri sot alimjan himitning naraziliq erzini ret qildi

Uyghur aptonom rayonluq yuqiri sot yéqinda xitay da'iriliri teripidin “Dölet mexpiyetlikini ashkarilash” jinayiti bilen eyiblinip 15 yilliq qamaq jazasigha höküm qilin'ghan Uyghur xristi'an muritliridin alimjan himitning naraziliq erzini resmiy ret qilip, esli hökümni küchke ige qilghan.
Muxbirimiz erkin
2011.03.04

Alimjan himit 2008‏-yili 1‏-ayda qolgha élinip, “Döletni parchilashqa qutratquluq qilish” we shundaqla “Dölet mexpiyetlikini chet'elliklerge ashkarilash ” jinayiti bilen eyiblen'gen. Qeshqer ottura sot mehkimisi uninggha 15 yilliq qamaq jazasi bergen idi. Lékin, alimjan we uning a'ilisi hökümge narazi bolup, aptonom rayonluq yuqiri sotqa erzi qilghan.

Merkizi amérikining téksas shtatidiki “Xitay yardem jem'iyiti ”ning amérika axbarat wasitilirige ashkarilishiche, yuqiri sot 2010‏-yilning axirliri alimjan himitning erzini körüp chiqip, esli hökümni küchke ige, dep qarar qilghan bolsimu, lékin qararni élan qilishni bir qanche ay kéchiktürüp, yéqinda uning a'ilisidikilerge uqturghan.

“Xitay yardem jem'iyiti” yuqiri sotning qarari alimjan a'ilisidikilerge éghir zerbe bolghanliqini bildürgen. Alimjan himitning ayali ilgiri mezkur jem'iyet arqiliq xelq'ara jem'iyettin alimjan'gha yardem qolini sozushni telep qilghan. B d t ning kishilik hoquq orgini alimjanning qolgha élinishi we jazagha tartilishi “Xalighanche jazalash weqesi”ge kiridighanliqini élan qilip, xitay hökümitidin uning adil sotlinish hoquqigha hörmet qilishni telep qilghan.
Közetküchilerning ilgiri sürüshiche, aptonom rayonluq yuqiri sotning xelq'ara bésimgha qarimay, alimjan'gha bérilgen qamaq jazasini saqlap qélishi, xitay da'irilirining Uyghurlargha chétishliq diniy, siyasiy délolarda xelq'ara ölchem we xitay qanunlirigha xilapliq qiliwatqanliqini körsitidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.