Чошқа зукими вируси дунявий тарқилишчан вирус дәп елан қилинди

Дуня сәһийә тәшкилати җиддий йиғин ечип чошқа зукими вирусини дунявий тарқилишчан характерлик кесәл дәп елан қилди. Бу дуня сәһийә тәшкилатиниң 1968 - йилида хоңкоңда оттуриға чиққан вә пүтүн дуняға тарқилип бир милйон кишиниң өлүмигә сәвәб болған зукам вируси вәқәси болуп аридин 40 йил өткәндин кейин тунҗи қетим бир вирусни дунявий тарқилишчан вирус дәп елан қилиши һесаблиниду. Һазир бу кесәллик дуняда тиз сүрәт билән йейливатқан болуп, дуня сәһийә тәшкилати буниңға қарши ваксина ишләпчиқиришниң тезләштүрүлидиғанлиқини вә бәзи дөләтләрниң пуқралириға саяһәт чәклимиси қоюши мумкинликини тәкитлиди.
Мухбиримиз ирадә
2009-06-11
Share

Һазир бу кесәллик әнгилийә, австралийә, японийә вә чили қатарлиқ дөләтләрдә юқумлиниш әһвали күндин  - күнгә өрләп бериватқан болуп , дуня сәһийә тәшкилатиниң мәсул хадимлири һәр қайси дөләтләрни чошқа зукими вирусиниң иккинчи қетимлиқ тарқилиш долқуниға нисбәтән толуқ тәйярлиқ көрүшини, йеқинда техиму көп юқумланғучиларниң оттуриға чиқидиғанлиқини әскәртти. Йеқинда хоңкоңда бир башланғуч мәктәптә 12 оқуғучи балиниң охшаш вақитта чошқа зукими вируси билән юқумланғанлиқи байқалған , әмма бу балиларниң чошқа зукимини нәдин юқтурувалғанлиқи ениқланмиған иди. Хоңкоң бу вәқә мунасивити билән , җүмә күнидин итибарән барлиқ йәсли вә башланғуч мәктәпләрни икки һәптә бойичә тақаш қарари алди.

Чошқа зукими һазирғичә 74 дөләткә тарқалған болуп, 27 миң 737 киши бу вирус билән юқумланди, буларниң ичидә 141 киши өлди. Хитай сәһийә министирлиқи  10 - июн күни уқтуруш елан қилип хитайда һазирғичә 105 кишиниң чошқа зукими вируси билән юқумланғанлиқини елан қилған. Һазирғичә уйғур диярида бундақ бир вәқәниң көрүлгәнлики һәққидә мәлумат берилмиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт