Choshqa zukimi wirusi dunyawiy tarqilishchan wirus dep élan qilindi

Dunya sehiye teshkilati jiddiy yighin échip choshqa zukimi wirusini dunyawiy tarqilishchan xaraktérlik késel dep élan qildi. Bu dunya sehiye teshkilatining 1968 - yilida xongkongda otturigha chiqqan we pütün dunyagha tarqilip bir milyon kishining ölümige seweb bolghan zukam wirusi weqesi bolup aridin 40 yil ötkendin kéyin tunji qétim bir wirusni dunyawiy tarqilishchan wirus dep élan qilishi hésablinidu. Hazir bu késellik dunyada tiz sür'et bilen yéyliwatqan bolup, dunya sehiye teshkilati buninggha qarshi waksina ishlepchiqirishning tézleshtürülidighanliqini we bezi döletlerning puqralirigha sayahet cheklimisi qoyushi mumkinlikini tekitlidi.
Muxbirimiz irade
2009.06.11

Hazir bu késellik en'giliye, awstraliye, yaponiye we chili qatarliq döletlerde yuqumlinish ehwali kündin  - kün'ge örlep bériwatqan bolup , dunya sehiye teshkilatining mes'ul xadimliri her qaysi döletlerni choshqa zukimi wirusining ikkinchi qétimliq tarqilish dolqunigha nisbeten toluq teyyarliq körüshini, yéqinda téximu köp yuqumlan'ghuchilarning otturigha chiqidighanliqini eskertti. Yéqinda xongkongda bir bashlan'ghuch mektepte 12 oqughuchi balining oxshash waqitta choshqa zukimi wirusi bilen yuqumlan'ghanliqi bayqalghan , emma bu balilarning choshqa zukimini nedin yuqturuwalghanliqi éniqlanmighan idi. Xongkong bu weqe munasiwiti bilen , jüme künidin itibaren barliq yesli we bashlan'ghuch mekteplerni ikki hepte boyiche taqash qarari aldi.

Choshqa zukimi hazirghiche 74 döletke tarqalghan bolup, 27 ming 737 kishi bu wirus bilen yuqumlandi, bularning ichide 141 kishi öldi. Xitay sehiye ministirliqi  10 - iyun küni uqturush élan qilip xitayda hazirghiche 105 kishining choshqa zukimi wirusi bilen yuqumlan'ghanliqini élan qilghan. Hazirghiche Uyghur diyarida bundaq bir weqening körülgenliki heqqide melumat bérilmidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.